Füri ilə Usik nə vaxt döyüşəcək?
“Top Rank” promouter şirkətinin başçısı Bob Arum bəyan edib ki, WBC versiyası üzrə superağır çəkinin çempionu Tayson Füri (33-0) və WBA, IBF və WBO versiyaları üzrə superağır çəkinin çempionu Aleksandr Usik (21-0) gələn ilin əvvəlində döyüşə bilər:
“Bu döyüşü təşkil etmək çətin deyil. Usikin ətrafında olanları tanıyıram, yaxşı adamlardı. Usik özü də möhtəşəm oğlandı. Düşünürəm ki, o, bu döyüşü istəyir. Bu döyüş keçiriləcək və ümid edirəm ki, gözləniləndən daha tez. Çox güman, gələn ilin əvvəlində olacaq, ancaq dekabrda olması da mümkündü”.
"Football-plus.az" xəbər verir ki, Füri ilə Fransis Nqannu oktyabrın 28-də Ər-Riyadda döyüşəcək. 10 raunddan ibarət döyüşdə ortaya WBC kəməri qoyulmayacaq. Usik isə avqustun 26-da Vrotslavda keçirdiyi son döyüşdə Daniel Dyubua ilə üz-üzə gəlib. Ukraynalı rəqibini 9-cu raundda nokauta salıb. Bununla belə, Dyubuanın 5-ci raunddakı zərbəsindən sonra Usik kanvasın üzərinə yıxılıb. Ancaq hakim həmin zərbənin qadağan (qurşaqdan aşağı) olunduğunu deyib.
Bu arada Füri maraqlı açıqlamalar verib. Onun fikrincə, Nqannunun əzələ kütləsinin həcminin böyüklüyü rəqibi üçün çatışmazlıqdı:
“Fransis uzun müddət davam gətirməyəcək, hədsiz böyük bədəni var. Böyük əzələ kütləsinə görə yaxşı görünür. Ona əl vuranda hiss etdim ki, çox sərtdi. Anladım ki, qalib gələ bilməz”.
Fürinin daha bir maraqlı açıqlaması isə bundan sonra mütləq dünya çempionluğunu arzulamaması haqda olub:
“Artıq özüm üçün yeni hədəflər müəyyənləşdirmişəm – ilin yekunlarına görə dünyanın ən yüksək ödənişli idmançısı kimi “Forbes”in siyahısının önündə qərarlaşmaq və Hollivud filmi çəkmək istəyirəm. Rinqdə uğura nail oldum, hər şey bitdi. Edə biləcəyim hər şeyi etdim, qazanılması mümkün olan bütün kəmərləri qazandım”.
Digər xəbərlər
