Oktyabrın 29-da Cənubi Amerikanın nüfuzuna görə ikinci klub turnirinə yekun vuruldu.

"Football-plus.az" xəbər verir ki, Sudamerikana Kubokunun (SK) finalında Braziliyanın “Fortaleza” və Ekvadorun “LDU Kito” komandaları qarşılaşdılar. Həlledici oyun Uruqvayda - Maldonado şəhərindəki “Dominqo Burgenyo Migel” stadionunda təşkil edildi.

Xatırladaq ki, bir il əvvəlki finalda da eyni ölkələrin təmsilçiləri qarşılaşmış, Braziliya “San Paulu”su Ekvadorun “İndependyente del Valye” komandasına 0:2 hesabı ilə uduzmuşdu. Bu dəfə də nəticə ekvadorluların xeyrinə oldu.
Final matçı təxminən bərabər mübarizə şəraitində keçdi. İlk hissədə hesab açılmadı, fasilədən sonra tərəflər 8 dəqiqə ərzində bir-birinin qapısına hərəyə bir dəfə yol tapdılar. Əsas vaxt 1:1 hesabı ilə sona çatdı. 30 dəqiqəlik əlavə vaxtda hesab dəyişməyincə qalibi penalti seriyasında müəyyən etmək lazım gəldi. Bu sınaqdan isə “LDU Kito” qalib çıxdı.
Beləliklə, argentinalı Luis Subeldianın çalışdırdığı komanda ikinci dəfə Sudamerikana Kubokunun qalibi oldu. Xatırladaq ki, Ekvador klubu bu turnirdə ilk uğurunu 2009-cu ildə qazanmışdı. Maraq üçün onu da qeyd edək ki, SK-da ən çox qalib gələn komandalardan “Boka Xuniors”, “İndependyente” (hər ikisi Argentina), “Atletiko Paranaense” (Braziliya) və “İndependyente del Valye” (Ekvador) də azarkeşlərini iki dəfə sevindiriblər.

final
Fortaleza - LDU Kito 1:1 (0:0, 1:1, 0:0), p. – 3:4
Fortaleza (Braziliya): Joao Rikardo, Titi, Bruno Paçeko, Brites, Tinqa, Joze Velison (Pedro Auqusto, 84), Poçettino (Tyaqo Qalyardo, 83), Kayo Aleşandre (Lukas Saşa, 105), Marinyo (Maçuka, 74), Lusero (S.Romero, 100), Gilyerme (Yaqo Pikaçu, 65).

LDU Kito (Ekvador): A.Dominges, Ade, Kintero, M.Martines, Kinyones (B.Ramires, 97), F.Rodriges, İbarra (Alsuqaray, 40), Pyovi, Xulio, S.Qonsales (Alvarado, 64), Gerrero.
Qollar: Lusero, 48 (1:0). Alsuqaray, 56 (1:1).
Penalti seriyası: Gerrero – 0:0 (qapıçı).Tyaqo Qalyardo – 1:0. Alsuqaray – 1:1. Yaqo Pikaçu – 2:1. M.Martines – 2:2. S.Romero – 2:2 (qapıçı). Xulio – 2:3. Tinqa – 3:3. Alvarado – 3:3 (qapıçı). Pedro Auqusto – 3:3 (qapıçı). Pyovi – 3:4. Brites – 3:4 (qapıçı).
Vərəqələr: Kayo Aleşandre, 18. Gerrero, 36. Gilyerme, 41. Marinyo, 52. Brites, 81. Pyovi, 99 - sarı.
Hakim: Xesus Valensuela (Venesuela).
29 oktyabr. Maldonado. 22000 tamaşaçı.