Artıq Libertadores Kubokunun (LK) 1/8 finalı arxada qalıb. Avqustun 9-11-i aralığında bu mərhələnin cavab oyunları keçirildi.

“Football-plus.az” xəbər verir ki, bu mərhələdə Braziliyanın 6, Argentinanın 4, Kolumbiyanın 2, Uruqvay, Boliviya, Paraqvay və Ekvadorun hərəyə 1 klubu çıxış edirdi. Cənubi Amerikanın ən nüfuzlu klub turnirinin ilk pley-off mərhələsi son mövsümün ən yaxşı komandalarının uğursuz çıxışı ilə daha çox yadda qaldı. Ötən il oktyabrın 29-da keçirilən finalda qarşılaşan “Flamenqo” və “Atletiko Paranaense” mübarizəni dayandırdı. LK-nın son qalibi “Flamenqo” evdə “Olimpiya”nı minimal hesabla məğlub etmişdi. Rio de janeyrolular Paraqvaydakı cavab görüşünün 8-ci dəqiqəsində hesabı açsalar da, qalan vaxtda üç cavabsız top buraxaraq turnirlə erkən vidalaşdılar. “Atletiko Paranaense” Boliviyadakı 1:3 hesablı məğlubiyyətin əvəzini “Bolivar”dan çıxdı. Lakin Braziliya klubu iki cavabsız qolla yalnız iki oyunun nəticəsinə əsasən hesabı bərabərləşdirə bildi. Nəticədə qalibi penalti seriyası ilə müəyyənləşdirmək lazım gəldi ki, bu sınaqdan boliviyalılar qalib çıxdılar.

Amma Braziliyanın digər iki təmsilçisi başqa ölkədən olan rəqiblərini üstələməyi bacardı. 1/8 finalda Braziliya – Argentina duellərinin qalibi regionun ən böyük ölkəsi oldu. “Fluminense” iki oyunun nəticəsinə əsasən “Arxentinos Xuniors”u mübarizədən kənarlaşdırdı. “İnternasyonal”la “River Pleyt” arasındakı matçların ümumi hesabı 3:3 oldu və penalti seriyasında Braziliya klubu qalib gəldi. Cənubi Amerikanın ən böyük ölkəsinin iki təmsilçisinin qarşılaşması da maraq doğururdu. “Palmeyras” səfərdə “Atletiko Mineyro”nu Rafael Veyqanın yeganə qolu ilə məğlub etmişdi. San Pauludakı cavab görüşündə hesabın açılmaması “Palmeyras”ın 1/4 finala adlamasına şərait yaratdı.

Argentinanın 4 komandasından ikisi azarkeşlərini sevindirə bildi. “Rasinq” evdə “Atletiko Nasyonal”ın qaısından üç cavabsız top keçirməklə Kolumbiyadakı mğlubiyyətin (2:4) əvəzini artıqlamasıyla çıxdı. “Boka Xuniors” isə “Nasyonal” səddini yalnız penalti seriyası ilə aşa bildi. 1/4 finalda “İndependyente del Valye”ni üstələyən “Deportivo Pereyra” da çıxış edəcək.

Beləliklə, növbəti mərhələ Braziliyanın 3, Argentinanın 2, Boliviya, Kolumbiya və Paraqvayın hərəyə 1 komandasının iştirakı ilə keçəcək. İlk oyunları avqustun 23-25-i aralığında keçiriləcək 1/4 final cütləri belə formalaşıb: Bolivar – İnternasyonal, Deportivo Pereyra - Palmeyras, Boka Xuniors – Rasinq, Fluminense - Olimpiya.

1/8 final, cavab oyunları

Fluminense (Braziliya) - Arxentinos Xuniors (Argentina) 2:0 (ilk oyun - 1:1)

Samuel Şavyer, 86. Con Kennedi, 90+7.

Atletiko Paranaense (Braziliya) - Bolivar (Boliviya) 2:0, p. – 4:5 (1:3)

Fernandinyo, 31-p. Vitor Roke, 67.

İnternasyonal (Braziliya) - River Pleyt (Argentina) 2:1, p. – 9:8 (1:2)

Merkado, 70. Alan Patrik, 78 – Roxas, 90.

Boka Xuniors (Argentina) - Nasyonal (Uruqvay) 2:2, p. – 4:2 (0:0)

Merentyel, 12. Advinkula, 47 – Tressa, 16. İ.Ramires, 75.

İndependyente del Valye (Ekvador) - Deportivo Pereyra (Kolumbiya) 1:1 (0:1)

Oyos, 6 – Anqulo, 50.

Palmeyras (Braziliya) - Atletiko Mineyro (Braziliya) 0:0 (1:0)

Rasinq (Argentina) - Atletiko Nasyonal (Kolumbiya) 3:0 (2:4)

Roxer Martines, 28. Oxeda, 50. Agirre, 56-öz qapısına.

Olimpiya (Paraqvay) - Flamenqo (Braziliya) 3:1 (0:1)

İ.Torres, 12. Ortis, 69. Bruera, 80 - Bruno Enrike, 8.

Bombardirlər: Paulinyo (Atletiko Mineyro) – 7, Kano (Fluminense), Pabon (Atletiko Nasyonal) – 6, Artur (Palmeyras), Pons (İndependyente Medelyin) - 5.