Oktyabrın 5-6-da Libertadores Kubokunun (LK) pley-offunda sonuncudan əvvəlki mərhələyə yekun vuruldu. Cənubi Amerikanın ən nüfuzlu klub turnirində yarımfinalın cavab oyunları keçirildi.

"Football-plus.az" xəbər verir ki, yarımfinalda Braziliyanın 3, Argentinanın 1 klubu çıxış edirdi. Bu o demək idi ki, ilk oyunlardan birində braziliyalıların dueli qaçılmaz idi. “Fluminense” – “İnternasyonal” matçı məhsuldar alınmışdı. Səfərdə 2:2 hesablı heç-heçəyə nail olan “İnternasyonal”ın finala çıxmaq şansı yüksək qiymətləndirilirdi. Argentinalı Eduardo Kudetin çalışdırdığı komanda oyuna yaxşı başladı: artıq 10-cu dəqiqədə Merkado meydan sahiblərini hesabda önə keçirdi. Portu aleqrililər minimalhesablı üstünlüyünü son dəqiqələrə qədər qoruya bildilər. Finiş ərəfəsində isə şok yaşadılar. Con Kennedi ilə Kano “Fluminense”nin finala çıxışını təmin etdilər. İlk oyunda dubl edən Kano bu dəfə Yoni Qonsalesin ötürməsi ilə “İnternasyonal”ın kabusuna çevrildi. 35 yaşlı argentinalı hücumçu LK-nın bu mövsümündəki qollarının sayını 12-yə çatdıraraq bombardirlərin siyahısındakı liderliyini bir qədər də möhkəmləndirdi.

San Pauluda keçirilən matça da maraq böyük idi. Braziliya və Argentina nəhəngləri arasındakı cavab görüşü də olduqca gərgin keçdi. İlk oyunda hesab açılmadığı üçün hər iki komanda həlledici matçda qapı torunu silkələməyə çalışacaqdı. İlk hissə qarşılıqlı hücumlar şəraitində keçsə də, hesabı qonaq komanda açdı: Kavani 23-cü dəqiqədə Merentyelin ötürməsini əla dəyərləndirdi. Amma 66-cı dəqiqədə “Boka Xuniors”un işi çətinə düşdü: müdafiəçi Roxo növbəti xəbərdarlığa görə komandasını meydanda azlıqda qoydu. “Palmeyras” bundan 7 dəqiqə sonra hesabı bərabərləşdirdi. Ev sahibləri rəqibi qapısına sıxışdırmaqla istəyinə çata bilərdi. Lakin az qala bütün komanda ilə müdafiə olunan buenos ayreslilər mübarizəni penalti seriyasına qədər uzada bildilər. “Lotereya” adlandırılan sınaqdan məhz Mariano Erronun çalışdırdığı Argentina klubu qalib çıxdı. Beləliklə, noyabrın 5-də Rio de Janeyroda keçiriləcək finalda “Fluminense” və “Boka Xuniors” qarşılaşacaq.

yarımfinal, cavab oyunları
İnternasyonal (Braziliya) - Fluminense (Braziliya) 1:2 (ilk oyun - 2:2)
Merkado, 10 – Con Kennedi, 81. Kano, 87.
Palmeyras (Braziliya) - Boka Xuniors (Argentina) 1:1, p. – 2:4 (0:0)
Pikeres, 73 – Kavani, 23.
Bombardirlər: Kano (Fluminense) - 12, Paulinyo (Atletiko Mineyro) - 7, Pabon (Atletiko Nasyonal) – 6.