İyulun 19-da Avropa (UEFA) və Cənubi Amerikanın (KONMEBOL) ali futbol qurumları arasında davam edən əməkdaşlıq çərçivəsində təsis edilən Çağırış Kuboku uğrunda ilk oyun keçirildi.

"Football-plus.az" xəbər verir ki, bu kubok uğrunda ilk dəfə Avropa Liqasının 2022/23 mövsümünün qalibi “Sevilya” və Sudamerikana Kubokunun 2022-ci ildəki çempionu “İndependyente del Valye” mübarizə apardı. İspaniyanın Sevilya şəhərindəki “Ramon Sançes Pisxuan” stadionunda qarşılaşan komandaların duelində qalib əsas vaxtda müəyyənləşmədi. Halbuki avropalıların müdafiədə yol verdikləri səhvdən yararlanaraq hesabı erkən açan ekvadorlular qələbəyə çox yaxın idilər. Onlar rəqibin çoxsaylı hücumlarına əsas vaxtda tab gətirsələr də, hesabı qoruya bilmədilər: Pedro Ortisin cavab qolunu vurması qalibin “lotereya” ilə müəyyənləşməsini qaçılmaz etdi. Qeyd edək ki, Çağırış Kubokunda oyun vaxtı 90 dəqiqə müəyyən edilib. Bu müddətdə hesab bərabər olduğu halda dərhal penalti seriyası qaydası tətbiq olunur. Bu seriyanın qəhrəmanı iki penaltini dəf edən Dmitroviç oldu. Beləliklə, “Sevilya” yeni kubokun ilk qalibi kimi tarixə düşdü.

Sevilya - İndependyente del Valye 1:1 (0:1, 1:0), p. - 4:1
Sevilya (İspaniya): Dmitroviç, Xuanlu, Nyanzu, Salas, Pedrosa (Qattoni, 65), Jordan, Bueno (P.Ortis, 77), Suso (İdrissi, 60), Qomes, Torres, İsaak (İvan Romero, 78).
İndependyente del Valye (Sanqolkuy, Ekvador): Ramires, A.Qarsiya, M.Fernandes, Karabaxal, Pelyerano (Kaysedo, 83), Faravelli, Sornosa (Oyos, 60), X.Ortis, Alsivar (Landasuri, 72), Dias (Kortes, 46), K.Rodriges (Moreno, 73).
Qollar: Dias, 9 (0:1). P.Ortis, 90+1 (1:1).
Penalti seriyası: Jordan – 1:0. Faravelli - 1:0 (qapıçı). İvan Romero – 2:0. Oyos – 2:1. İdrissi – 3:1. Moreno – 3:1 (qapıçı). Qomes – 4:1.
Vərəqələr: Sornosa, 44. Ramires, 90 - sarı.
Hakim: Rade Obrenoviç (Sloveniya).
19 iyul. Sevilya. 19407 tamaşaçı.