Misli premyer-liqasında 2-ci tur “Zirə” və “Sabah”ın dueli ilə start götürdü.

Ötən mövsüm bu komandalar arasında avrokuboka vəsiqə uğrunda mübarizə getdiyini nəzərə alsaq, Mərdəkandakı görüşün gərgin keçəcəyi gözlənilirdi. Ancaq hər şey fərqli oldu. Qısaca desək, “tələbələr” “qartallar”ı rahat məğlub etdi. Murad Musayevin yetirmələri daha yaxşı təsir bağışladı, daha yaxşı hücum etdi və ən əsası şanslardan maksimum yayralandı. “Sabah” ardıcıl ikinci qələbə ilə cari mövsümdə medallar uğrunda mübarizəyə tam hazır olduğunu göstərdi. Düzdü, “Qarabağ”la titul rəqabətindən danışmaq hələ tezdi. Ancaq görünən odu ki, “ağ-göylər” turdan-tura oyun planında artırır, iddiasını ortaya qoyur.

Eyni sözləri ötən mövsümün bürünc mükafatçısı barədə söyləmək olmur. Rəşad Sadıqovun komandasının hücum potensialı yetərincə yüksək olsa da, bunu heç bir şəkildə ortaya qoya bilmir. Təbii ki, iki turdan sonra hər iki komanda barədə uzaqgörən nəticə ortaya qoymaq ağılsızlıq olar. Hətta “Sabah”ın özü də bunun bariz nümunəsidi. Ötən mövsümə nəzər salsaq, ilk dövrədə komandanın cəmi 1 xal yığdığını görə bilərik. Burdan da belə qənaətə gəlmək olar ki, mövsümün əvvəlində ardıcıl qələbələr və ya yenilgilər o demək deyil ki, artıq hər şey həll olunub. Xüsusilə potensial daha çox şeyə arxalanmağa imkan verəndə. Heç şübhəsiz, qəsəbə təmsilçisi cari mövsümdə də həm medal, həm də avrokuboka vəsiqə uğrunda mübarizə aparacaq. Lakin startda çox xal itirmək və bunun da nəticəsi kimi rəqiblərdən geri qalmaq istəmirlərsə, “qartallar”ın toparlanmaq vaxtıdı.
Turun son günündə keçirilən matçların özəlliyi o idi ki, sonda qalib gələn komandaların hər ikisi görüşün taleyini, demək olar ki, ilk yarım saatda həll etdi. “Neftçi” – “Kəpəz” qarşılaşmasının 15-ci dəqiqəsində “Bakcell Arena”nın tablosu artıq 3:0 göstərirdi. O da maraqlıdı ki, “Neftçi” bu 3 qolu 5 dəqiqə aralığında vurdu. Görünən o idi ki, Regekampfın komandası “Rapid”ə məğlubiyyətin acısını gəncəlilərdən çıxmaq istəyir. “Kəpəz”sevərləri sevindirən yeganə amil kimi yeni transfer Şuaybunun fərqlənməsini vurğulamaq olar. Nigeriyalı yarımmüdafiəçinin meydana çıxması ilə qonaqların oyununda canlanma hiss olundu. Şuaybu “Neftçi”nin müdafiəsi üçün əsl başağrıya çevrilmişdi. Konfrans Liqasında uğursuzluğa düçar olan “Neftçi” “Kəpəz”lə görüşdə premyer-liqada yüksək yerlər uğrunda mübarizə aparmaq niyyətini ortaya qoydu. “Kəpəz” ilk hissəni çox pis keçirib qapısında 3 qol görsə də, fasiləıdən sonra maraqlı oyun nümayiş etdirdi. “Neftçi”nin hesabdan irəli gələn arxayınlığını nəzərə almasaq, Yaşar Vahabzadənin komandası hücum qurmağı bacardığını, əks-hücumda təhlükəli olduğunu nümayiş etdirdi.

Qəbələdə eyniadlı komanda “Şamaxını” qəbul edirdi. Və bu matçda da hər şey 1-ci hissənin ilk yarısında həll olundu. 20-ci dəqiqəyə kimi “Qəbələ” 3:0 önə keçdi və sürəti azaltmasaydı, yəqin daha çox qol vuracaqdı. Matçın qalan dəqiqələri orta, hətta aşağı tempə keçdi. “Qırmızı-qaralar” oyunun taleyinin həll olunduğunu nəzərə alıb sürəti aşağı salmışdısa, qonaqların potensialı sürətli, dinamik oyun sərgiləməyə imkan vermirdi. Hər halda, “Şamaxı” təsəlli qolu vura bildi. Bu qarşılaşma bir daha göstərdi ki, “şirlər” qışda heyəti gücləndirmək yönündə addım atmasa, mövsümün sonunda turnir cədvəlinin zirzəmisində yer alacaq.

Maraqla gözlənilən oyunlardan biri də “Səbail”lə “Turan Tovuz” arasında reallaşdı. Hər iki komanda ilk turda uduzduğundan bu dəfə hədəf 3 xal idi. Hədəfə qonaqlar çatdı.

Və turun son oyunu. Sabah Çempionlar Liqasının ilk pley-off oyununa çıxacaq “Qarabağ”ın Sumqayıtda “ağır artilleriya”ya istirahət verəcəyi gözlənilən idi. Qurban Qurbanovun meydana buraxdığı start “11-liy”i çox çalışsa da, meydan sahiblərinin müqavimətini qıra bilmirdi. Qələbənin əldən gedəcəyini görən baş məşqçi sona 20 dəqiqə qalmış ulduzlarını meydana buraxmağı lazım bildi. Və bu addım özünü doğrultdu. “Kimyaçılar” isə belə hücum xətti ilə çətin ki qarşıdakı oyunlarda nəyəsə nail olsun. Baqanın çalışdırdığı komandanın müdafiəsi pis görünməsə də, irəlidə “dişsiz” oyunla qol həsrəti hələ uzun sürəcək. Artıq iki turun geridə qalmasına baxmayaraq, sumqayıtlılar hələ də rəqib qapısına yol tapa bilməyib.

Misli premyer-liqası
1-ci dövrə, 2-ci tur
12 avqust
Zirə - Sabah 1:3
13 avqust
Sumqayıt – Qarabağ 0:2
Səbail – Turan Tovuz 0:1
14 avqust
Qəbələ - Şamaxı 3:1
Neftçi – Kəpəz 5:2
1. Sabah 2 2 0 0 6-1 6
2. Neftçi 2 2 0 0 6-2 6
3. Qarabağ 2 2 0 0 5-1 6
4. Qəbələ 2 2 0 0 5-1 6
5. Zirə 2 1 0 1 3-4 3
6. Turan Tovuz 2 1 0 1 1-2 3
7. Səbail 2 0 0 2 1-4 0
8. Şamaxı 2 0 0 2 1-4 0
9. Kəpəz 2 0 0 2 3-7 0
10. Sumqayıt 2 0 0 2 0-5 0
Bombardirlər: Mikels (Sabah), Şeydayev, Qurbanlı (hər ikisi "Qarabağ"), Taşkın (Zirə) – 2.
Növbəti turun oyunları: 19 avqust – Şamaxı – Səbail, Turan Tovuz – Qarabağ; 20 avqust – Sabah – Neftçi; 21 avqust – Zirə - Sumqayıt, Kəpəz – Qəbələ.

RƏŞAD