"Oyun sonrası mətbuat konfransında  Qurban Qurbanov böyük ölçüdə çox şeyə aydınlıq gətirdi. Dedi ki, "Bayer"in səviyyəsi bəllidi, rəqib meydanda hər şeydə üstün idi, odu ki, müdafiədə oturub, rəqibi əks-hücumda tutmaq taktikasını seçsəydik, bunun heç bir effekti olmayacaqdı". Mən də Qurban müəllimə haqq verirəm. Həqiqətən də rəqiblə təmsilçimiz arasımda səviyyə fərqi göz önündəydi. Onlar meydan bizə boşluq və rahat oynamaq imkanı vermədi. Düzdü, erkən qol buraxandan sonra "Qarabağ" açıq futbola keçdi. Bunun effektini də gördük. Juninyo pressinq etməklə penalti qazandı, Toral soyuqqanlıqla yerinə yetirdiyi zərbə sayəsində hesaba tarazlıq gətirdi. Amma bundan sonra meydan sahibləri daha ehtiyatlı, effektli oynamaqla bizi topsuz qoydu. "Bayer-04", demək olar ki, oyunboyu meydanın mərkəzində və "Qarabağ"a aid hissəsində ağalıq etdi. Rəqib komanda şəklində hücumda çox effektliydi. Təssəvvür edin ki, qapışı xaric yerdə qalan bütün oyunçular, eləcə də mərkəz müdafiəçiləri rahatlıqla hücumçu kimi çıxış edirdi. Bizdə isə irəlidəki futbolçular topsuz qaldığından nəsə edə bilmədilər. Zubirə, ümumiyyətlə, göz açmağa imkan vermədilər. Söz yox ki, o, uzun məsafələrə sürətlə reyd edə biləcək oyunçu deyil. Zubirin əsas işi texnikası sayəsində rəqib müdafiəçilərinin başını gicəlləndirib qapıya yol tapmaqdı ki, bunu da edə bilmədi. Elvin sürəti hesabına nələrsə etmək istəsə də, rəqib müdafiəçilər onun da atacağı addımları əvvəlcədən oxuya bilirdi. Meydan sahiblərindən Virtsin topla davranışı, qapını görməsi, assistləri və keçidləri möhtəşəm idi.  Qısası, Xabi Alonso "Bayer"in gücünə güc qatıb. Düşünürəm ki, “Qarabağ” bu oyundan yaxşı dərs almalı və Bakıdakı cavab görüşünə ciddi hazırlaşmalıdı. Nəzərə alsaq ki, paralel keçən oyunda "Molde" "Həkken"i darmadağın etdi, bu artıq "köhlən atlar" üçün həyəcan təbili olmalıdı. "Qarabağ" Bakıda "Bayer-04"dən 1 xal qoparmağı və qalan iki oyundan da maksimum xal götürməyi hədəfə almalıdı".