"Qarabağ"ı açıq futbol oynadığına görə qınamaq düzgün deyil. Çünki qapalı futbol oynayacağı təqdirdə məğlub olmayacağını iddia etmək sadəlövlük olardı. Həqiqətin gözünə dik baxmalıyıq. "Bayer-04" hər cəhətdən təmsilçimizdən güclü idi və bunu sərgilədiyi oyunla da göstərdi. Bir daha deyirəm, söhbət "Qarabağ"ın qələbə qazanmasından və ya heç-heçə etməsindən gedə bilməzdi. Əsas olan Leverkuzen təmsilçisinin neçə qol vurmaqla qələbəsini rəsmləşdirəcəyi idi. Deyək ki, "köhlən atlar" öz qapısı önündə qapanaraq komanda şəklində müdafiə olundu. Bu da uzaqbaşı 5 yox, 2-3 top buraxmağımızla nəticələnəcəkdi.  Amma məğlubiyyət reallığını dəyişdirməyəcəkdi. Yalnız "Bayer-04"ün təmsilçimizdən üstünlüyünü yox, Almaniya bundesliqası ilə Azərbaycan çempionatı arasındakı fərqi də gördük. İki ölkənin çempionatı arasında böyük bir uçurum var. Odu ki, "Qarabağ"ı məğlubiyyətə görə qınamaq, açıq futbol oynadığına görə tənqid etmək yersizdi.  Hesab edirəm ki, Ağdam təmsilçisi bu məğlubiyyətdən nəticə çıxarmalıdı. Real görünməsə də, Bakıdakı oyunda almanlardan 1 xal götürmək olar. Unutmayaq ki, futbolda sürpriz, sensasiyalar tez-tez olur. Sadəcə, qrupdakı perspektivimizi  nəzərə alsaq, şanslarımız var və çox şey özümüzdən asılıdı. İnanıram ki, “Qarabağ” 2-ci yerin sahibi kimi qrupdan çıxacaq". 

“Əvvəlcə ondan başlayaq ki, rəqib çox güclü idi. Baxanlar da bu iki komanda arasındakı böyük uçurumu gördü. Fikir bildirmək, nəyəsə görə irad tutmaq çox çətindi. Bəli, "Bayer" öncədən favorit idi, məğlubiyyət də gözlənilməz sayıla bilməz. Sadəcə, daha layiqli mübarizə və daha kiçik hesab ola bilərdi ki, bu da olmadı. Amma dediyim kimi, buna görə hansısa irad bildirmək də çox çətindi, çünki bu zaman dönüb çempionatımıza, futbolumuzun səviyyəsinə baxmalıyıq. Həmin "Qarabağ" "BayArena"da 30 min azarkeşin gözü önündə o cür oyundan sonra gəlib "Bəhramov"un boş tribunaları önündə "Araz-Naxçıvan"la oynayacaq. Bu iki məqam arasında ən azı beş dəfə fərq olduğunu nəzərə alsaq, "Bayer-04"ə darmadağına görə "Qarabağ"ı qınaya bilmirik. Oyun sisteminə gəlincə, bu haqda da nəsə demək çətindi. Bu gün düşünmək olar ki, bəlkə də "Bayer"ə qarşı elə açıq oynamalı deyildik, bəlkə də daha çox qapanıb əks-hücumlara bel bağlamalıydıq. Çünki diqqət yetirdizsə, "Qarabağ" 1:1-dən sonra da oyunun tempini salmağa çalışmadı, futbolçularımız topu tez oyuna daxil edir, hətta Lunyov topu tutandan sonra futbolçularımız meydançada yerini tutmamış topu oyuna daxil edirdi. Lakin heç kim də zəmanət verə bilməz ki, "Qarabağ" oyunu tam müdafiədən qursaydı, fərq bundan az olacaqdı. İstənilən halda, "Bayer" çox güclü idi və bizə şans yeri qoymadı".