Ölkəmizin U-17 yığması ötən şənbə Avropa çempionatının seçmə mərhələsi çərçivəsində ilk oyuna çıxıb.

Xəbər verdiyimiz kimi, 4-cü qrupun oyunları Serbiyada keçirilir. "Stara Pazova"da keçirilən görüş ev sahiblərinin böyükhesablı qələbəsi ilə nəticələnib. 1:5 uduzan komandamızın yeganə qolu 11-ci dəqiqədə avtoqol kimi qeydə alınıb. Qrupun digər matçında Lüksemburqla Sloveniya (1:1) heç-heçə edib. Bizimkilər qrupda ikinci qarşılaşmanı bu gün eyni arenada Sloveniyaya qarşı keçirəcək.

Füzuli Məmmədovun çalışdırdığı komandanın ilk oyunda belə darmadağınla üzləşəcəyini gözləmirdik. Çünki komanda seçmə mərhələ ərəfəsində bir neçə toplanış, yoxlama oyunu keçmişdi, çalışdırıcı yetirmələrindən razı qaldığını və gənclərin toplanışdan-toplanışa inkişaf etdiyini vurğulayırdı. Amma 1:5-dən sonra Füzuli bəydən səs-soraq yoxdu. Nə qədər çalışsaq da, məşqçidən açıqlama ala bilmədik. AFFA-nın Media və İctimaiyyətlə Əlaqələr Departamentinin rəhbəri Elnur Məmmədlinin dediyinə görə, baş məşqşi yalnız Sloveniya ilə oyun bitəndən sonra açıqlama verəcək. Aşağı yaş qruplarımız – U-17, U-19 ardıcıl darmadağınlarla üzləşirsə, ölkənin əsas komandasını qınamağa da haqqımız yoxdu. Çünki aşağıdan gələn, yetişən oyunçu yoxdu. Varsa da belə, Füzuli Məmmədov, U-19-un çalışdırıcısı Aqil Nəbiyev belələrini tapa bilmir.

ABDULLA İSMAYILOĞLU