Yığma / Manşet
551
12.03.2022, 18:38
Füzuli Məmmədov istədiyini ala bilməyib - AÇIQLAMA
16 yaşadək futbolçulardan ibarət yığma təlim-məşq toplanışını başa vurub.
Komanda hazırlıq müddətində iki yoxlama oyunu da keçirib. İlk rəqib “Neftçi”nin müvafiq yaş qrupu olub ki, qarşılaşma "ağ-qaralar"ın 2:0 hesablı qələbəsi ilə yekunlaşıb. Digər matçda isə U-16 “Sumqayıt”ın U-17 komandasını darmadağın edib - 5:0. Emil Şəkixanovun dubl etdiyi oyunda digər qolları Eltun Babazadə, Balamirzə Mehdizadə və Elgün İsaqov vurub.
Toplanışı dünən başa vuran millinin baş məşqçi Füzuli Məmmədovla əlaqə saxladıq. O, hazırlıq prosesi, yoxlama oyunları və planlar haqda bunları söylədi:
"Toplanış martın 2-dən 11-ə qədər olan müddəti əhatə etdi. Düşərgəyə 25 futbolçu dəvət olunmuşdu. İki yoxlama oyunu nəzərdə tutulmuşduq. Bu toplanış seşleksiya xarakterli idi. Futbolçuların həm fərdi keyfiyyətlərini öyrənmək, həm də onları daha yaxından tanımaq üçün buna ehtiyac var idi. Demək olar ki, məqsədimizə çatdıq. Tam istədiyimiz kimi oldu. Çox yaxşı şərait yaradılmışdı. Yoxlama oyunlarında isə futbolçuları daha yaxından tanımağa çalışdıq. İstəyirik ki, daha istedadlı futbolçuları üzə çıxaraq. Qarşıda 5 təlim-məşq toplanışı olacaq. Ümumilikdə bu il üçün 6 toplanış nəzərdə tutulub. Bəzi futbolçular var idi ki, bu dəfə dəvət edə bilmədik. Onları da yoxlayacağıq. Hamıya şans veriləcək. Futbolçuları daim izləyəcəyik, məşqlərinə belə gedəcəyik. Kim keyfiyyətli oyun sərgiləsə, özünü yaxşı tərəfdən göstərsə, o da milliyə dəvət alacaq. Amma hələ ki tam istədiyimi ala bilmirəm. Dediyim kimi, əsas məqsəd uşaqları tanımaq idi. Futbolçuların vəziyyəti o qədər də acınacaqlı deyil, normaldı. Hamısı yavaş-yavaş uyğunlaşmağa çalışır. Dəvət alanların məşqçiləriylə də danışacam, onlarla da məsləhətləşəcəyik. Daha yaxşı formada olmaları üçün əlimizdən gələni edəcəyik".
GÜNAY VƏLİYEVA
