"Biz də "İrəvan"dakı hadisələrdən oyunçuların müsahibələri əsasında xəbər tutduq. Lakin rəqibin oyuna gəlməyəcəyi barədə bizdə heç bir rəsmi məlumat yox idi. PFL nümayəndələri də İmişliyə gəlmişdilər. Klub olaraq, prosedur qaydalarını icra elədik. Oyun saat 3-də başlamalıydı, ancaq qaydalara əsasən 15.30-a kimi gözlədik. Bir neçə gün əvvəldən bilsəydik ki, "İrəvan" gəlməyəcək, azarkeşlərimiz üçün yoxlama görüşü təşkil edə bilərdik. Stadionda, klubun rəsmi səhifəsində elan etdik ki, bu oyuna bilet alıb gələn fanatlarımız növbəti turda evdə qarşılaşacağımız "Zaqatala" ilə matça da köhnə biletlə gələ biləcəklər. Həqiqətən də rayonda bu oyuna böyük maraq, ajiotaj var idi. İnşallah, anşlaqı növbəti görüşdə gözləyirik".