“Bəhramov” müəmması: De Byazi bir söz dedi, stadionun direktoru başqa
Dünən yığmamız AÇ-2024-ün seçmə mərhələsi çərçivəsində Tofiq Bəhramov adına stadionda Avstriyanı qəbul etdi. Maraqlıdı ki, rəqib oyunöncəsi mətbuat konfransını və məşqi ölkəmizdə keçirmədi. Bununla belə, yığmamız da sözügedən tədbirləri oyunun keçiriləcəyi stadiona yox, “Dalğa Arena”ya saldı.
Bu məqam, təbii ki, media nümayəndərlinin diqqətindən yayınmadı. Srağagün millimizin baş məşqçisi Canni de Byaziyə bu yöndə sual ünvanlandı. İtaliyalı mütəxəssisin cavabını xatırladaq:
“Çox istəyərdik ki, orda keçirək. Sadəcə, bizə meydançanın ideal vəziyyətdə olmadığını və məşq etsək, dağıla biləcəyini dedilər”.
Ardından əməkdaşımız Cavid Əliyev qeyd olunanlarla bağlı adı çəkilən stadionun direktoru Tələt Məmmədovdan bu bilgini aldı:
“Stadion oyuna tam şəkildə hazırdı. Heç bir problem yoxdu. Hətta arenanın qazonunu yay sistemidən qış sisteminə keçirmişik”.
Göründüyü kimi, bu iki açıqlama bir-biriylə uzlaşmır. Belə anlaşılır ki, tərəflərdən biri səhih məlumata sahib deyil. Bəs həqiqət nədi? Avstriya millisinin də məşq və mətbuat konfransını Bakıda keçirməməsinin səbəbləri maraq doğurur. Mövzunu araşdırmaq məqsədilə AFFA-nın mətbuat xidmətinin rəhbəri Elnur Məmmədovu aradıq. Onun “Football-plus.az”a söylədikləri:
“Düzü, Canni de Byazinin mətbuat konfransında niyə elə dediyini bilmirik. Bunu özündən soruşub maraqlanacağıq. Tofiq Bəhramov stadionunu oyuöncəsi məşq üçün millinin ixtiyarında idi. Biliyimə görə, ot örtüyündə heç bir problem yoxdu. Buna oyun vaxtı bir daha əmin olacağıq. De Byazi özü istədi ki, məşq “Dalğa Arena”da keçirilsin. Avstriyaya gəlincə, rəqib oktyabrın 15-də Azərbaycana gəlib. Açıq məşqin və mətbuat konfransının ölkələrində keçirilməsi şəxsi qərardı. Bizdən qarşı tərəfə nəsə deyilməyib. Öz seçimləri olub”.
KƏNAN BAHADIR
Digər xəbərlər
