Sabah millimiz AÇ-2024-ün seçmə mərhələsində növbəti oyununu keçirəcək.

Komanda Tofiq Bəhramov adına Respublika stadionunda Avstriyanı qəbul edəcək.

"Football-plus.az" xəbər verir ki, yığmamızın baş məşqçisi Canni de Byazi matçdan öncə keçirilən mətbuat konfransında jurnalistlərin suallarını cavablandırıb. Sizi 67 yaşlı mütəxəssisin fikirləriylə tanış edirik:

- Avstriyanın 5 əsas oyunçusu olmayacaq. Bu halda qələbə qazanmaq mümkündü? Qalib gəlsək, 7 xalımız olacaq. Belə nəticə AÇ hədəflərini dəyişə bilər?
- Belə pozitiv düşüncə çox xoşuma gəldi. Amma asan olmayacaq. İlk matçda da nəticənin fərqli olacağını düşünürdüm. Amma 0:2-dən sonra lazımsız səhvlərə yol verib rəqibin işini asanlaşdırdıq. Nəticədə 1:4 uduzduq. Komanda kimi inkişaf edirik, 14 matçda 7 qələbə qazanmışıq. Sabah da yaxşı nəticə qazanmağa çalışacağıq ki, uğurlu nəticəyə davam edək. Avstriyanın güclü futbolçuları var. 4-5 əsas oyunçuları olmasa belə, yerlərini daha yaxşılarla doldura bilərlər. Bu zaman üstünlük kimi gördüyümüz nüanslar bizə qarşı çevrilər.

- Sabah ilk dəfə Tofiq Bəhramovda oyuna çıxacaqsız. Anşlaq gözləyirsiz? Azarkeşlərə nə demək istəyirsiz?
- Gəlib, bizə dəstək göstərsələr 11 nəfərə qarşı 12 nəfərlə oynamış olacağıq. Stadionda azarkeş çox olanda daha yaxşı olur.

- Oyunöncəsi məşqi niyə Tofiq Bəhramovda keçirmədiz?
- Çox istəyərdik ki, orada keçirək. Sadəcə bizə meydançanın ideal vəziyyətdə olmadığını və məşq etsək dağıla biləcəyini dedilər.

- Yığmamız səfərdən qayıtdıqdan sonra meydana çıxmaqda çətinlik çəkir. Heyətdə hansı dəyişikliklər olacaq?
- Düzdü, ağır oyundan, uzun səfərdən qayıtmışıq. Bu gün ilk məşqimizi edəcəyik. Dünən ancaq bərpa məşqinə çıxdıq. Dəyişikliyə bu gün qərar verəcəyik.

KƏNAN BAHADIR