Tofiq Bəhramov adına Respublika stadionunun başı bəlalıdı. Hər nə qədər təmir olunsa da, düzəlmir ki düzəlmir. Azərbaycanın futbol məbədi yenə bağlanıb. Stadionun ot örtüyü dəyişilir.

İyunda stadion təmirə bağlandı. Sevindik ki, hər şey düzələcək, “Bəhramov”da hansısa problem qalmayacaq. Arena avqustda təmirdən çıxdı. Gördük ki, ot örtüyü o qədər də mükəmməl deyil. Stadionda böyük dəyişikliklər yoxdu. Hətta miks-zonaya damır. Sevincimiz qursağımızda qaldı. Qələt etdik, sevindik.

Hələ bu harasıdı?! Stadionda ancaq “Qarabağ” oyun keçirib. “Köhlən atlar” Avropa Liqasının 3-cü, pley-off və qrup mərhələsində 3 matçda arenadan istifadə edib. Misli premyer-liqasında “Sabah”la görüş də burda keçirilib. Cəmi 4 qarşılaşmaya ot örtüyü sıradan çıxır? Nə baş verir? Stadion nə üçün tez-tez təmirə ehtiyac duyur?

Səbəbləri soruşmaq üçün arenanın yeni direktoru Tələt Məmmədovla əlaqə saxlamaq istədik. Lakin bu heç cür mümkün olmadı.

Tələt bəyin bu vəzifəyə təyinatını ictimaiyyətə birinci “Futbol+” çatdırıb. Sonradan 2-3 dəfə ondan arena ilə bağlı açıqlamalar da almışıq. Lakin avqustun 17-dən bəri direktoru tapa bilmirik. Dəfələrlə zəng etsək də, mesaj yazsaq da, bizə cavab vermir. Yəqin Tələt bəyin başı daha vacib işlərə qarışıb. Stadionun da mətbuat katibi yoxdu ki, onu tez-tez narahat edək. Qələt etdik, sevindik ki, “Neftçi”də çalışmış, idman mediasına yaxın biri Tofiq Bəhramov adına Respublika stadionuna direktor təyin olunub. İndi Tələt bəy bizi peşman edir.

İLKİN SULTANLI