Ötən həftə qadın hənbol yığmaları arasında Avropa çempionatının təsnifat mərhələsinin oyunları keçirildi.

Şimali Makedoniya, İspaniya və Litva ilə 5-ci qrupda yer alan yığmamız hər iki qarşılaşmada uğursuz nəticə əldə etdi. Aleksandr Revvanın komandası səfərdə Şimali Makedoniyaya 17:40, evdə İspaniyaya 18:38 uduzdu. Bu nəticələrlə bağlı yığmanın çalışdırıcısı “Football-plus.az”ın bəzi suallarını cavabladı.

- Avropa çempionatının seçmə mərhələsinə uğursuz başladız. Şimali Makedoniya və İspaniyaya böyük hesabla məğlub olduz. Yığmanın bu cür uduzmasına səbəb nə oldu?
- Şimali Makedoniya öz evində oynadığı üçün favorit idi. Həmçinin üç əsas oyunçumuz bizimlə deyildi, mən də viza məsələsinə görə Skopyeyə yollana bilmədim. İnşallah, onlar gəlsin, daha da yaxşı olacağıq. İspaniya ilə matça gəlincə, onlar qrupun güclü komandasıdı. Həndbol İspaniyada çox inkişaf edib, çempionatlarında 14 komanda var.

- Sizcə, hazırda komandada nə çatışmır? Və nəyi düzəltmək lazımdı?
- Biz çatışmayan cəhətləri oynadıqca görürük. Məsələn, İspaniya yığması daha çox oyun keçirir. Bu da onların turnirlərdə yaxşı performans göstərməsinə gətirib çıxarrır.

- Azərbaycan həndbolunun hazırkı səviyyəsini necə görürsüz?
- İki aydı bura gəlmişəm, dəqiq nəsə deyə bilmərəm. Amma əlimdən gələni edəcəm ki, Azərbaycanda həndbolu inkişaf eləsin.

- Azərbaycan həndbolunun inkişafı üçün nələr etmək lazımdı?
- Hazırda bütün gücümü qızların həndboldakı inkişafına yönəltmişəm. Çox perspevtivli oyunçularımız var. İspaniya ilə görüşün ilk hissəsində yaxşı mübarizə apardılar. Sadəcə, onlar bizdən səviyyə baxımından yüksək idi. Lakin həvəsdən düşmürük və həmişə inkişaf üçün çalışacağıq.

- Növbəti oyun gələn ilin fevralında Litva yığmasına qarşıdı. Bu oyundan gözləntiləriniz nədi?
- Əlbəttə, biz hər görüşə qələbə niyyəti ilə çıxırıq. Əlimizdən gələni edəcəyik ki, bu oyunda da yaxşı nəticə qazanaq.

- Milli ilə yanaşı, “Azəryol”da çalışdırırsız. Lakin avrokuboklar sizin komandanız üçün yaxşı keçmədi. Elə ilk mərhələdə Bosniya və Hersoqoviniya təmsilçisi “ZRK Kriva”ya məğlub olduz...
- Səfərdə oynayırdıq və hakimlər də rəqibə çox kömək edirdi. Düzdü, bunu bəhanə eləmirəm. Bizim də səhvlərimiz oldu. Çalışırıq ki, bu səhvlərdən dərs götürək və daha yaxşı olaq. Qızlara inanıram.

- Ölkə həndbolunun gələcəyi üçün bəyəndiyiniz oyunçu varmı?
- Gənc həndbolçulardan “Azəryol”da çıxış edən Kama Bayramova, Mehparə Əliyeva istedadlı oyunçulardı. Sadəcə, problem odu ki, pandemiya dövründə iki il Azərbaycanda həndbol olmayıb. Lakin digər ölkələr bu idman növü ilə daim məşqul olublar. Buna görə də hazırda sizin ölkədə həndbol Avropadakı kimi deyil. Ancaq mən çalışacam ki, bu fərqi aradan qaldırım.

- Həndbol millilərimizə və klublara əcnəbi məşqçilərin gətirilməsini tənqid edənlər də var. Bu məsələyə münasibətiniz necədi?
- Federasiya məndən kömək istədi və mən də bunu qəbul etdim. Görürsüz ki, İspaniya yığmasının də məşqçisi əcnəbidi.

CAVİD ƏLİYEV