“Avstriya və İsveçə çətin anlar yaşada bilərik” - De Byazi
Azərbaycan milli komandası beynəlxalq yoldaşlıq görüşü çərçivəsində "Dalğa Arena"da İordaniyanı məğlub etdi - 2:1.
"Football-plus.az" xəbər verir ki, yığmamızın baş məşqçisi Canni de Byazi matçdan sonra keçirilən mətbuat konfransında jurnalistlərin suallarını cavablandırdı. Mütəxəssisin fikirlərinə keçid alaq:
"Matçın çətin keçəcəyini bilirdik. Belə də oldu. Rəqib fiziki cəhətdən yaxşı və aqresiv oyun sərgilədi. Belçikayla görüşdə çox güc sərf etdiyimizdən komandada yorğunluq hiss olunurdu. Qarşılaşmaya tam hazır deyildik. Meydançanın vəziyyəti də pisdi. Gözəl oyun alınmasa da, qələbə qazana bildik.
- Qarşıdakı sınaqlardan əvvəl keçiriləcək mətbuat konfranslarında da Emin Mahmudovu görəcəyik? Xatırlayıram ki, 5 oyunluq qələbə seriyasında belə edirdiz.
- Mütləq. Bizim onunla fartımızı tutmuşuq (gülür). Emin meydana çıxanda yorğun olduğunu gördük. O, bizim əsas qaleodurumuzdu. Peşəkar və böyük keyfiyyətlərə malik futbolçudu. Ümumiyyətlə, bu gün meydanda çox gənc komanda var idi. Müdafiəçilərimiz 98-97-ci il təvəllüdlüdü. Məncə, heyət üçün yaxşı test oldu. Gələcəkdə bundan düzgün yararlansaq, işimiza faydalı olacaq.
- Bu gün Belçika ilə matçdakından daha çox emosional idiniz Bu, nəylə əlaqədardı?
- Çünki səsim batdığı üçün qışqıra bilmirdim. Fikirlərimi jestlərlə çatdırmağa çalışırdım. Məncə, daha yaxşı oynaya bilərik. Uşaqların bəziləri deyirdi ki, meydança pisdi. Düşünürəm ki, başqa cür olsa hücumda daha yaxşı oynayıb qollar vura bilərdik.
- Qrupda dörd oyunumuz qalıb. Artıq azarkeşlər başda olmaqla futbol ictimaiyyəti yaxşı oyun yox, yaxşı nəticə gözləyir. Siz bundan sonrasını necə proqnozlaşdırırsız?
- Növbəti qarşılaşmalarda yaxşı nəticələr qazanacağımıza ümid edirəm. İndi azarkeşlər də bizə inanır.Ümid edirəm ki, yaxşı nəticələr qazanarıq. Əmin olun ki, hədəflərimiz üçün 101 faizimizi qoyacağıq. Bəllidi ki, Estoniya və Avstriyaya qarşı ağır oyunlar olacaq. Fikrimcə, Bakıda Belçikaya qarşı göstərdiyimiz oyunla Avstriya və İsveçə çətin anlar yaşada bilərik.
- Misli premyer-liqasında rəqabət artıb. Milliyə çağırılan futbolçuların çıxış etdiyi komandaların əksəriyyətində 6-7 legioner var. Bu, ümumi işinizə necə təsir edir?
- Çempionatın inkişafı millinin gələcəyi üçün faydalı olacaq. Yaxşı haldı ki, Azərbaycana xarici ölkələrdən futbolçular gəlir. Özlərini yaxşı tərəfdən görsədir. Lakin onların say artımı yerli oyunçuların milliyə çağırılma ehtimalını azaldır. Məcburuq ki, ən yaxşılarını seçək. Ümumi işə gəlincə, beynimdə formalaşdırdığım komandada çox dəyişiklik etmək istəmirəm. Balanslı heyət qurmaq istəyiriksə, yola eyni adamlarla davam etmək daha səmərəlidi.
KƏNAN BAHADIR
Digər xəbərlər
