"Avstriya çox yaxşı komandadı, bunu etmək çətin olacaq"
Sabah millimiz AÇ-2024-ün seçmə mərhələsində növbəti oyununu keçirəcək.
Canni de Byazinin rəhbərlik etdiyi kollektiv Tofiq Bəhramov adına Respublika stadionunda Avstriyanı qəbul edəcək.
"Football-plus.az" xəbər verir ki, millimizin kapitanı Emin Mahmudov matçdan öncə keçirilən mətbuat konfransında jurnalistlərin suallarını cavablandırıb. Sizi futbolçunun fikirləriylə tanış edirik:
"Bizi yaxşı komandaya qarşı oyun gözləyir. Rəqibin intensiv oyun tərzi var. Futbolçular çox sürətlidi. Son 2 oyunda qələbə qazanmışıq. İstəyirik ki, yaxşı nəticələrin davamı gəlsin. Sabah meydana qələbə üçün çıxacağıq. Yaxşı nəticə üçün əlimizdən gələni edəcəyik".
- Sənin mətbuat konfransında çıxdığın matçlarda adətən qələbə qazanırıq. Özünü millidə uğur talismanı sayırsan?
- Belə şeylərə inanmıram. Burda sadəcə kapitan kimi danışır, komandanın fikrini azarkeşlərə çatdırıram.
- Milli uzun fasilədən sonra Tofiq Bəhramovda oynayacaq. Bu arenada oynamaq sizə necə təsir edəcək?
- Stadionun şəhərin mərkəzində olması yaxşı haldı. Buna görə görüşə daha çox azarkeş gələ bilər. Əsas uğurlu nəticə əldə etməkdi. Tərəfdarları sevindirmək istəyirik.
- Səncə, Avstriyaya necə qalib gəlmək olar?
- Bir-birimizə yaxın olmalı, çox sıx oynamalıyıq. Çünki onlar yaxşı top saxlayır. Ara paslarında sərrastdılar. Öz meydançamızda top itirməməliyik. Xatırlayırsızsa, səfərdə 1:4 hesabı ilə uduzanda onlar topu bizdən alıb hücuma qoşulurdu. Çalışacağıq ki, rəqibə çox şans verməyək. Düzdü, Avstriya çox yaxşı komandadı, bunu etmək çətin olacaq. Lakin bacarmaq lazımdı.
KƏNAN BAHADIR
Digər xəbərlər
