Fransa çempionatında 8-ci tur maraqlı hadisələrlə zəngin oldu.

"Football-plus.az" xəbər verir ki, səfərdə “Reyms”i məğlub edən “Monako” vahid liderliyi qorudu. “Mets”ə qalib gələn “Nitsa” “knyazlar”dan yalnız 1 xal geri qalır. 3-cü pilləyə isə son çempion yüksəldi. “Renn” ilə səfər oyununda hədsiz çox təhlükəli vəziyyət yaradan parislilər 3 qol vura bildi. Doğma “Velodrom”da “Havr”ı qəbul edən “Marsel” debütanta heç bir şans vermədi. Bu, cənubluların Cennaro Qattuzonun rəhbərliyi altında ilk qələbəsi idi. “Loryan”la ev oyununda ilk yarıdan sonra 3:1 öndə olan “Lion” qələbəni əldən verdi. “Monpelye” – “Klermon” oyunu isə qalmaqal üzündən bitmədi. Tribunadan atılan petard qonaqların qapıçısı Diavın ayaqların yanına düşdü, partlayış zamanı o hətta huşunu itirdi. Hesab 4:2 meydan sahiblərinin xeyrinə olarkən oyun dayandırıldı. Həkimlər qapıçını xərəkdə apardı, qalan futbolçular isə paltardəyişmə otağına yollandı.

Luis Enrike cari mövsümdə uduzmayan “Renn” ilə səfər oyununda 4-3-3 sxemini seçmişdi. Start heyəti ilə bağlı elə bir sürpriz yox idi. Oyunun əvvəlində qonaqlar ərazi üstünlüyünə yiyələnsə də, bir dəfə də təhlükəli vəziyyət yarada bilmədilər. Bir sözlə, 32-ci dəqiqəyə qədər oyun sönük keçirdi. Amma həmin dəqiqədə Markinyosun daban ötürməsi ilə başladığı hücumun sonunda Vitinya hesabı açdı. Heç 5 dəqiqə keçməmiş Hakimi fərqi artırdı. Yalnız 0:2-dən sonra bretonlar bir qədər fəallaşdı. 2-ci hissə “Renn”in hücumları şəraitində başladı. 56-cı dəqiqədə Quiri qollardan birinin əvəzini çıxdı. Bundan sonra daha bir qəribə hadisə baş verdi. 57-ci dəqiqədə meydana çıxan Kolo Muani cəmi bir dəqiqə sonra hesabı dəyişdi – 1:3. Son 30 dəqiqə qarşılıqlı hücumlar şəraitində keçdi. Həm meydan sahibləri, həm də qonaqlar fərqlənə bilərdi. “Renn” çox çalışsa da, cari mövsümdəki ilk məğlubiyyətdən qaçmağı bacarmadı.

“Reyms”in qonağı olan “Monako” 42-49-cu dəqiqələr aralığında üç qol vurdu. Bununla da oyunun taleyi həll olundu. Düzdü, “Reyms” 57-ci dəqiqədə təsəlli qolu vura bildi.

“Marsel” “Havr” ilə oyuna elə fəal başladı ki, hər kəs qolun zaman məsələsi olduğunu anladı. Təzyiq altında özünü itirən müdafiəçi Sanqante 18-ci dəqiqədə qapıların yerini səhv saldı. Cəmi 3 dəqiqə sonra Obameyanq fərqi artırdı. İlk yarının sonluğunda “Havr”ın ümidləri lap azaldı. 40-cı dəqiqədə Ndiaye meydandan qovuldu. İnamla oyunun axarına nəzarət edən marsellilər sonda 3-cü dəfə fərqləndi. Obameyanqın ötürməsindən sonra Sarr fərqi biabırçı həddə çatdırdı.

“Nitsa” “Mets” ilə səfər oyununa inamlı başladı. Qolu da çox gözləmək lazım gəlmədi. 14-cü dəqiqədə əlcəzairli Budaui qapıçı həmvətəni Ukicanı məyus etdi. Maraqlıdı ki, qarşılıqlı hücumlara rəğmən, bu qol oyunda yeganə oldu. “Nitsa” Liqa 1-də hələ də məğlubiyyət üzü görməyən yeganə komandadı.

Turun qalan oyunlarına gəlincə, liderlər qrupunda olan “Brest” “Tuluza” ilə qarşılaşmanın 3-cü uzatma dəqiqəsində məğlubiyyətdən qaçdı. Gərgin mübarizə şəraitində keçən “Lans” – “Lill” oyununda da qalib müəyyənləşmədi – 1:1. “Nant” səfərdə “Strasbur”u məğlub etdi. “Lion” “Loryan”la oyunun 41-ci dəqiqəsində 3-cü qolu vurandan sonra qələbənin əlində olduğunu düşündü. Ancaq 2-ci hissədə bu üstünlük əridi. Krupi ilə Yonqvanın vurduğu qollar məhsuldar heç-heçəni rəsmiləşdirdi – 3:3.

8-ci tur
Reyms – Monako 1:3
Teuma, 57-p. – Yakobs, 42. Baloqun, 46. Ben Yedder, 49. (19000)
Monako: Ken, Maripan, Maqassa (Matsima, 46), Sinqo, Zakariya, Yakobs, Qolovin (Minamino, 73), Fofana (Kamara, 90), Ben Yedder, Diatta, Baloqun (Akliuş, 82).
Renn – PSJ 1:3
Quiri, 56 – Vitinya, 32. Hakimi, 36. Kolo Muani, 58. (27734)
PSJ: Donnarumma, Ernandes, Markinyos, Şkrinyar, Hakimi, Zair-Emeri, Uqarte (Ruis, 75), Vitinya (Soler, 88), Mbappe, Ramuş (Kolo Muani, 57), Dembele (Barkola, 75).
Marsel – Havr 3:0
Sanqante, 18-öz qapısına. Obameyanq, 21. Sarr, 84. (63576)
Marsel: Lopes, Murilyo, Mbemba (Nadir, 88), Balerdi, Kloss, Unai (Kondoqbia, 74), Ronjye, Arit (Vitinya, 78), Sarr (Soqlo, 88), Obameyanq, Ndiaye (Meyte, 88).
Strasbur – Nant 1:2
Dion, 90+1 – Koko, 50. Mutussami, 57. (25274)
Mets – Nitsa 0:1
Budaui, 14. (23160)
Brest – Tuluza 1:1
Satriano, 90+3 – Maqri, 27. (14509)
Lion – Loryan 3:3
Nuama, 21. Lakazett, 22; 41-p. – Krupi, 16; 54. Yonqva, 79. (43100)
Lans – Lill 1:1
Maçado, 70 – Andre, 45+2.
“Monpelye” – “Klermon” oyunu hesab 4:2 meydan sahiblərinin xeyrinə olarkən dayandırılıb.
1. Monako 8 5 2 1 21-17 17
2. Nitsa 8 4 4 0 9-4 16
3. PSJ 8 4 3 1 17-7 15
4. Brest 8 4 3 1 9-7 15
5. Reyms 8 4 1 3 14-11 13
6. Marsel 8 3 3 2 12-11 12
7. Lill 8 3 3 2 11-10 12
8. Renn 8 2 5 1 14-10 11
9. Nant 8 3 2 3 14-15 11
10. Tuluza 8 2 4 2 10-9 10
11. Strasbur 8 3 1 4 8-11 10
12. Monpelye 7 2 3 2 12-9 9
13. Havr 8 2 3 3 10-12 9
14. Lans 8 2 2 4 8-13 8
15. Mets 8 2 2 4 7-14 8
16. Loryan 8 1 4 3 13-18 7
17. Lion 8 0 3 5 6-16 3
18. Klermon 7 0 2 5 5-12 2
Bombardirlər: Mbappe (PSJ) – 7, Məhəmməd (Nant), Adams, Əl-Tamari (hər ikisi “Monpelye”), Ben Yedder (Monako) – 5.
Növbəti turun oyunları oktyabrın 20-22-si aralığında keçiriləcək: Havr – Lans, PSJ – Strasbur, Nitsa – Marsel, Loryan – Renn, Lill – Brest, Nant – Monpelye, Tuluza – Reyms, Monako – Mets, Lion – Klermon.

Turun rəqəmi
150 – “Monako”da ardıcıl 5-ci mövsümünü keçirən təcrübəli futbolçu Liqa 1-də qol sayını bu həddə çatdırdı. Vissamın knyazlıq klubuna qədər “Sevilya” ilə “Tuluza”nın formasını geydiyini də xatırladaq.

Fakt
Mbappe son 4 oyunda meydanı qol vurmadan tərk edib. O, “Renn” ilə oyuna qədər “Nyukasl” (1:4), “Klermon” (0:0) və “Marsel” (4:0) ilə oyunlarda da fərqlənə bilməmişdi. Kilian sonuncu dəfə 2021-in payızında klubun və Fransa yığmasının heyətində ardıcıl 6 oyunda “susmuşdu”.

Turun ulduzu
Əşrəf Hakimi (PSJ) – “Renn”in mövsümdəki ilk məğlubiyyətinin memarlarından biri də mərakeşli müdafiəçidi. Markinyosun başladığı və PSJ-nin ilk qolu vurduğu hücumda Əşrəf önəmli rol oynadı. 36-cı dəqiqədə isə ofsayd tələsindən ustalıqla qurtularaq rəqib qapısına yol tapdı. Mərakeşlinin arxada qalan turlarda üç qol vurduğunu da xatırladaq.

Turun sitatı
Loran Nikollen, “Monpelye”nin prezidenti: “Nə hiss edəcəm? İkrah, məyusluq, təəssüf... Sona 5 dəqiqə qalmış 4:2 udursansa, turnir cədvəlində 6-cı yerə çıxacaqsansa, oyunçular qələbə üçün özünü öldürürsə... Hansısa axmaq tribunadan nəsə atır və oyun dayanır. Bizi tez-tez ambisiyasızlığa görə qınayırlar. Belə axmaqlarla, çətin ki, hansısa ambisiyamız olsun”.