Son çempion kimi keçirdiyi ötən mövsümü yalnız 6-cı pillədə tamamlayaraq fanatlarını üzən “Trabzonspor” xorvatiyalı Nenad Byelitsanın başçılığı altında yeni mövsümə iddialı hazırlaşır.

"Football-plus.az" xəbər verir ki, qaradənizlilər Türkiyədə yay transfer dönəminin ən fəal klublarındandı. Trabzon təmsilçisi artıq 3 yeni oyunçu ilə anlaşıb. Əvəzində komandanı 4 futbolçu tərk edib. Ayrılanlar Yusuf Yazıcı, Jan-Filipp Qbamin, Lazar Markoviç və Marek Hamşikdi. İlk 3 futbolçu “Trabzonspor”da icarə əsasında çıxış edirdi və müqavilə ilə məxsus olduqları klublara qayıdıblar. Hamşik isə karyerasını başa vurub. Maksi Qomeslə Mark Bartranın da ayrılacağı gözlənilir. Rəhbərlik Qomesin satışından ən azı 3-4 milyon avro gəlir əldə etməyi planlaşdırır.

Yeni transferlər isə Dimitris Kurbelis, Xoakin Fernandes və xorvatiyalı ulduz Mislav Orşiçdi. Yunanıstan yığmasının üzvü olan Kurbelis 29 yaşlı dayaq yarımmüdafiəçisidi. O, Bakasetas və Siopisdən sonra “Trabzonspor”un indiki heyətində 3-cü yunanıstanlı futbolçuya çevrilib. “Asteras”ın yetirməsi olan futbolçu 2016-dan bəri “Panatinaikos”un şərəfini qoruyurdu. Bu klubla müqavilə müddəti bitən Kurbelis ilk dəfə legioner həyatı yaşayacaq. Onunla “2+1” illik müqavilə imzalanıb. Kurbelisin illik qazancı 1 milyon avro təşkil edəcək. Xoakin Fernandes isə 27 yaşlı ispaniyalı mərkəz müdafiəçisidi. “Almeriya”nın yetirməsi olan futbolçu 2018-dən bəri “Valyadolid”in şərəfini qoruyurdu. “Trabzonspor” bu oyunçu ilə ikiillik müqavilə imzalayıb. Fernandesin illik qazancı ilk mövsümdə 1,3 milyon avro, 2-ci mövsümdə 1,4 milyon avro təşkil edəcək.

Orşiçə gəlincə, o, son illərdə Zaqreb “Dinamo”sunun əsas vuran ayağı hesab olunurdu. Orşiçi “Dinamo”ya 2018-də məhz Byelitsa gətirmişdi. Onlar birlikdə Zaqreb klubunda 2 mövsüm ərzində böyük uğurlar qazandıqdan sonra Byelitsa “Dinamo”dan ayrılmışdı. Son mundialda da Xorvatiyanın heyətində fərqlənməyi bacaran Orşiç sol vinger mövqeyində çıxış edir. O, ötən mövsümün qış fasiləsində “Sauthempton”a yollansa da, İngiltərə macərası qısa və uğursuz alındı. Təcrübəli futbolçu yeni klubunda cəmi 6 rəsmi oyuna çıxa bildi. Üstəlik “Sauthempton” premyer-liqa ilə vidalaşdı. Orşiçlə “2+1” illik müqavilə imzalayan “Trabzonspor” ingilislərə 2,4 milyon avroluq təzminatı 3 hissəyə bölərək ödəyəcək.

Bundan başqa, futbolçunun növbəti satışından əldə olunacaq gəlirin 20 faizi də “Sauthempton”a çatacaq. Orşiçin Türkiyədəki illik qazancı 1,6 milyon avroya bərabər olacaq. O, 2023/24 və 2024/25-də superliqada ümumilikdə 40 oyuna çıxacağı təqdirdə birillik şərti müqavilə avtomatik qüvvəyə minəcək. Bundan başqa, qaradənizlilər “Altınordu”nun 17 yaşlı gənc qapıçısı Onuralp Çevikkan ilə üçillik müqavilə imzalayıblar. Qeyd edək ki, “Trabzonspor” dünən Sloveniyaya yollanıb. Komanda bu ölkədə ayın 23-nə qədər toplanış keçəcək.

ƏLİ