"Turan Tovuz"un yeni transferi Otto Conun "Football-plus.az" saytına müsahibəsi.

- "Turan Tovuz"a keçidin necə alındı?
- Menecer Toğrul Əsgərov mənimlə əlaqə saxladı. Klubun mənimlə maraqlandığını bildirdi. Daha sonra layihə xoşuma gəldi və Azərbaycana gəlməyi seçdim.

- Daha əvvəl ölkəmiz və klub haqda məlumatın var idi?
- Bəli, sizin çempionatı izləyirdim. Çünki ən yaxın dostum Yusuf Laval "Neftçi"də çıxış edirdi. Ondan da Azərbaycan haqda məlumat almışdım.

- Türkiyədəki hazırlığınız necə keçdi?
- Hazırlığımız çox yaxşı keçdi. Komandada əhval-ruhiyyə əladı. "Turan Tovuz" yeni mövsümdə mübariz kollektiv olacaq. Mənim məqsədim isə qol vurmaq və komandama kömək etməkdi.

- Baş məşqçiniz Ayxan Abbasov barədə nə deyə bilərsən?
- Yaxşı insandı. Münasibətmiz də əladı. Həm də taktika cəhətdən üstünlükləri çoxdu. Komandaya uyğunlaşmağımıza kömək edir. Onunla gələcək oyunlarda birlikdə işləməyi səbirsizliklə gözləyirəm.

- Yeni mövsümdə necə "Turan Tovuz" görəcəyik?
- Yeni mövsümdə fərqli "Turan Tovuz" görəcəksiz. Yaxşı oyunçular transfer edilib. Kollektiv olaraq ən yaxşısını etməyə çalışacağıq.

- Ölkə çempionatında iddialı komandalar çoxdu. Bunlardan "Qarabağ", "Neftçi", "Sabah" və "Zirə"nin adını çəkmək olar. Səncə, bu komandalarla mübarizə apara biləcəksiz?
- Bizi məğlub etmək asan olmayacaq. Çünki yüksək nəticələr qazanmaq üçün meydanda döyüşəcəyik. Bilirəm ki, qollar da vuracam. Bizdən gözləntilər böyükdü.

- Bu mövsüm səndən neçə qol gözləyək?
- Ümid edirəm ki, çox qol vuracam. Hazırda bütün diqqətimi komandaya uyğunlaşmağa yönəltmişəm.

- İlk turda rəqibiniz debütant "Araz -Naxçıvan"dı. Bu oyundan gözləntilərin nədi?
- Yoldaşlıq oyununda da "Araz-Naxçıvan"la qarşılaşmışdıq. Amma bu dəfə çətin matç olacaq. Yaxşı nəticə istəyirik. Premyer-liqaya qələbə ilə başlamaq bizim üçün vacibdi.

- Artıq Azərbaycan mətbəxi ilə tanış olmusan?
- Düzünü desəm, sizin mətbəxtlə tanış deyiləm. Amma yaxın zamanda yeməklərinizin dadına baxacam.

- "Turan Tovuz" azarkeşlərinə nə demək istərdin?
- Bizə inansınlar. Azarkeşlərimizin dəstəyi ilə yaxşı nəticələr qazanacağımıza ümid edirik.

CAVİD ƏLİYEV