Ötən mövsüm basketbol üzrə ölkə çempionatında uğursuz çıxış edən “Şəki”nin yeni mövsümə iddialı başlayacağı “sükanı arxasına” gətirdiyi Aleksandr Ovoyço Ujohdan və etdiyi transferlərdən görünür.

Bəs görəsən, komanda çempionata necə hazırlaşır? Bu suallar ətrafında şəkililərin nigeriyalı çalışdırıcısı ilə söhbətləşdik.

- Nigeriyada tanınmış mütəxəssissiz. Bəs necə oldu ki,“Şəki”dən gələn təklifi qəbul etdiz?
- Bəli, Qabon, Benin və Bəhreyndə işləmişəm. Nigeriyada tanınmış klublara rəhbərlik etmişəm. Məni bura Azərbaycan Basketbol Federasiyası gətirdi. Şəki fantastik yerdi, dağların ətəyində sakit rayondu. Mənzərəsi heyranedicidi. Mən buranı və insanlarını sevirəm. Bu amillər komandaya gəlişimə səbəb oldu. Qonaqpərvərliyə görə hər birinizə təşəkkür edirəm.

- Müqavilə müddətiniz nə qədərdi?
- Birillik müqavilə bağlamışam.

- Komandanı tam komplekləşdirmisiz?
- Hələ ki tam heyətlə deyilik. Bir neçə oyunçu kollektivin hazırlığına qoşulmayıb. İnşallah, onlar da gəlsin, tam halda toplanışı davam etdirəcəyik.

- Neçə oyunçunuz var?
- 5 legioner, 6 yerli oyunçu var. Onların üçü nigeriyalı, biri amerikalı, digəri isə konqoludu.

- Adlarını çəkərdiz...
- Yerlilər Tərlan Abduləzizov, Kamal İmamverdiyev, Məhəmməd Sadıqov, Nihad Tağıyev, Hüseyn Əsgərli, İdris Məmmədov, Nadir Əhmədov, Emin Cəfərovdu. Əcnəbilər isə Paul Solomon Dibal, Oluvatoyin Solomon Aransanyin, Adebayo Adimbolarin Oduleye, Kriss Klark və Dimerkia Lenda Duoanqadı.

- Belə görünür ki, ötən mövsümdən cəmi üç oyunçu – Tərlan, Kamal və Məhəmmədi heyətdə saxlamsız.
- Bəli, komandada yenilənmə baş verib. Yeni kollektivik və yeni hədəflər uğrunda döyüşəcəyik.

- Bu mövsüm “Şəki” ilə ölkə çempionatındakı hədəfləriniz nədi?
- Məqsədim “Şəki” basketbol komandasının, oyunçularının ötən mövsümdəki çıxışının necə dəyişdiyini görməkdi. Həmçinin də bu liqada başqa rəqiblərlə ən yüksək səviyyədə rəqabət aparacaq kolektiv yaratmaq istəyirəm.

- Komandanın ötən mövsümdəki uğursuzluğunu unutdurmağa çalışacağınıza inanırsız?
- Bəli, bu komandanın ötən il yaxşı performans göstərmədiyini bilirəm. Amma yeni oyunçuların böyük potensiala malik olduqlarını, meydanda can qoyacaqları günü səbirsizliklə gözləyirəm.

- Bu mövsüm ölkə çempionatında güclü və iddiası böyük komandalar çıxış edəcək. Ümumiyyətlə, rəqiblər haqda məlumatınız varmı?
- Bütün komandaların çıxışını izləməmişəm. “Yutub”dan bir neçə rəqibimizin keçmiş görüşləri ilə tanış olmuşam. Bəli, bilirəm, güclü rəqiblərimiz var. Bəlkə də hazırda digər komandalarda keçid dövrüdü. Lakin biz də sona qədər mübarizə aparacağıq. Azarkeşlərimizə yaxşı oyun göstərmək niyyətindəyik.

- Azərbaycana əsasən Avropa ölkələrindən, postsovet məkanından və Amerikadan basketbolçular gəlir. Afrikadan isə çox az olur. Bu mövsüm də “Şəki”də üç nigeriyalı olacaq.
- Hazırda afrikalı oyunçular basketbola can atır. Mənlə razılaşarsız ki, bir çox afrikalı oyunçu dünyanın ən yüksək reytinqli basketbol liqası olan MBA-da çıxış edirlər. Ona görə də inanıram ki, afrialı oyunçular “Şəki”yə müsbət təsir göstərəcək.

- Nigeriyadakı basketbolla Azərbaycan basketbolu arasında hansı fərqlər var?
- Nigeriyada basketbol daha sərtdi. Fiziki cəhətdən güclü oyunçular var. Amma ümid edirəm ki, bu mövsüm liqada yerli istedadlı oyunçular üzə çıxacaq.

- Azərbaycana gələn bir çox legioner oyunçular, məşqçilər bölgələrdə yox, paytaxt Bakıda qalmaq istəyirlər. Bəs sizin bu baraədə planınız nədi?
- Şəkini ilk gəldiyim gündən sevirəm. Bura möhtəşəmdi. Mən və əcnəbi oyunçular da bu fantastik bölgədə yaşayacağıq. Biz afrikalılar lüks tətil, qonaqlıq və şənliklərdən zövq almağa yox, iş görməyə gəlmişik. Mənim və oyunçularımın bu səfalı bölgədən şikayəti yoxdu. Məqsədim burdakı balaca uşaqlarımıza da basketbolun sirlərini öyrətməkdi.

- Az müddətdi burdasız, lakin Azərbaycan mətbəxtindən sevdiyiniz yemək varmı?
- Sevimli yeməyim quzu ətidi. Amma eşitmişəm ki, Şəkinin xüsusi bir yeməyi var – piti (gülür).

CAVİD ƏLİYEV