"Belə oyunla uduzmamalıydıq" - Elmar Baxşıyev
Misli premyer-liqasının 9-cu turunda "Səbail" səfərdə "Qəbələ"yə qalib gəldi - 1:0.
"Football-plus.az" xəbər verir ki, matçdan sonra "Qəbələ"nin baş məşqçisi Elmar Baxşıyev media nümayəndələrinin önünə çıxıb. Əvvəlcə sizi mütəxəssisin fikirləri ilə tanış edirik:
"Bilirdik ki, bizi ağır oyun gözləyir. "Səbail" yaxşı qurulmuş komandadı. Hissələri ayrı-ayrılıqda dəyərləndirsək, böyük üstünlüyə sahib idik, çoxlu qol epizodlarına girdik. Təəssüf ki, son nöqtəni qoya bilmədik. Ağır məğlubiyyətdi. Çünki belə oyunla uduzmamalıydıq. Futbolun yazılmamış qanunu var, bu qədər epizodu vurmayacaqsansa, sonda rəqibə də şans verəcəksən".
- Son nöqtəni qoya bilməməyinizi necə dəyərləndirərdiz?Oyunçularınızın səviyyəsi çatmadı?
- Yox, səviyyə ilə əlaqələndirməzdim. Sadəcə, hansısa epizod olur ki, orada soyuqqanlılıq nümayiş etdirmək lazım gəlir. Son oyunlar göstərir ki, çoxsaylı qol epizodları yaradırıq. Amma soyuqqanlılıq çatmır ki, onları dəyərləndirək. Daha çox üzərində dayanılası epizodlar var ki, işləyirik. İnanıram ki, sonluğu da gətirəcəyik.
- Sizcə, bu gün futbolun ədalətsizliyini gördük?
- Oyunun keyfiyyətinə görə böyük hesablı qələbə də gözləmək olardı. Amma futbol ona görə maraqlı və gözəldi ki, bir hücum edən də bu oyunu uda bilər.
- Zurab Oçiqava yenidən zədələndi. Hazırkı durumu nə yerdədi?
- Zurabın dediyinə görə, əzələsində dartılma var. Müayinədən keçdikdən sonra dəqiq vəziyyəti biləcəyik.
CAVİD ƏLİYEV
Digər xəbərlər
