Misli premyer-liqasının 6-cı turunda "Araz-Naxçıvan" öz meydanında "Neftçi"yə qalib gəldi - 1:0.

Oyundan sonra "Neftçi"nin baş məşqçisi Adrian Mutu media nümayəndələrin suallarını cavablandırdı. Sizi əvvəlcə mütəxəssisin fikirləri ilə tanış edirik:

"Bizim üçün pis oyun oldu. Qapımızda bir epizod oldu, onda da buraxdıq. Özünüz də gördünüz ki, bizim hər hissə qol şanslarımız oldu. Təəssüf ki, yararlana bilmədik".

- Bir çox dəyişiklər edirsiz. Tam heyəti müəyyənləşdirməmisiz?
- Penaltini çıxsaq, müdafiə xətti yaxşı oynadı. Rəqibin heç bir şansı olmadı. Dəyişikliklər olur. Amma sırf bu gün keçirilən "Araz-Naxçıvan"la görüşdə, rəqibə təhlükəli epizod vermədik. Sadəcə, penalti oldu.
 
- Qara Qarayev hansı planınıza uyğun gəlmədi ki, onu fasilədə əvəzlədiniz?
- Özünüz də bilirsiz ki, Qara zədələndi. Buna görə də onu dəyişdik. Başqa bir şey yoxdu. Ümumiyyətlə, oyun baxımından kifayət qədər normal idik. Penalti epizodu bizim üçün ağır nəticələndi. Ona görə də, daha diqqətli olmalıyıq. Xüsusən də, əks-hücumlara fikir verməliydik.

- "Sumqayıt"la matçdan sonra demişdiz ki, əyninizdəki pencək sizə uğur gətirir. Bu fikrinizdə qalırsız?
- Bəli, mən yenə də belə düşünürəm.

- Müdafiədə yaxşı oynadığınızı dediniz. Amma rəqib qapısı qarşısında təhlükəli qol epizodlarınız da çox deyildi...
- Rəqib 10 nəfərlə müdafiə olunurdu. Hər iki epizodda şans yaratdıq. Sadəcə rəqib bütünlüklə müdafiə olunurdu. Biz nə qədər qol epizodu yarada bilərdik?

- Bu gün iki futbolçu - Reziuan Mirzov və Lukas Melano debüt etdi. Onların çıxışı barədə nə deyə bilərsiniz?
- Hər iki oyunçu təzədi. Onlara uyğunlaşmaq üçün vaxt lazımdı. Bu gün də az oynadılar. Düzdü, tam istədiyimiz formada deyillər. Oyundan-oyuna formaya düşəcəklər, tam komandaya uyğunlaşacaqlar.

CAVİD ƏLİYEV