Həftənin maraqla gözlənilən oyunları sırasında Bakıda keçirilən “Səbail” – “Araz-Naxçıvan” matçı da var idi.

Hər iki komandanın turnir cədvəlinin üst sıralarında yer alması gözlənilməz məqam idi. Ya bu komandalardan biri “ASCO Arena”dakı qarşılaşmada qələbə qazanaraq yoluna davam etməli, ya da heç-heçə nəticəsində hər ikisi büdrəməli idi.

Qarşılaşmanın startından elə hiss olunurdu ki, maraqlı və məhsuldar oyun izləyəcəyik. Görüşə qonaqlar daha yaxşı başladı. 12-ci dəqiqədə Orxan qapını dəqiq nişan ala bilmədi. 20-ci dəqiqəyə kimi qonaqlar ərazi üstünlüyünə malik idi. “Səbail” bu andan sonra özünə gəlməyə başladı. 22-ci dəqiqədə Pedronun uzaqdan zərbəsi qapıdan aralı keçdi. Bundan sonra tərəflərin qarşılıqlı hücumlarına şahidlik etdik. Əvvəlcə Turalın zərbəsi qapıdan aralı keçdi. “Səbail”in cavabı gecikmədi. Qomis bir rəqibini keçərək topu qapıya göndərdi. Lakin Avram etibarlı oyunla diqqəti çəkdi. 34-cü dəqiqədə Orxan yüzfaizlik qol imkanını qaçırdı. Müdafiəçilərin səhvindən istifadə edən hücumçu topu ələ keçirdi. Lakin onun zərbəsini Səlahət ayaqları ilə dəf etdi. 37-ci dəqiqədə naxçıvanlılar hesabı açdı. Turanın cərimə zərbəsindən ötürməsini Kurdiç başla qapıdan keçirdi. Lakin yan xətt hakimi bayrağını qaldıraraq oyundankənar vəziyyət qeydə aldı. VAR da bu qərarı təsdiqləyəndən sonra oyun davam etdi.

Oyunun axarından hiss olunurdu ki, qonaqlar tezliklə hesabı açacaq. Lakin hadisələr belə cərəyan etmədi. 44-cü dəqiqədə Ribeyro Pedroya qarşı cərimə meydanında qaydanı pozdu. Rəşad Əhmədov dərhal penalti təyin etdi. Topun arxasında keçən yarımmüdafiəçinin zərbəsi dəqiq oldu. İlk hissə bu hesabla bitdi.

Fasilədən sonra məşqçilər hansısa dəyişiklik etmədi. Lakin oyuna maraq azalmadı. Komandalar yenə qarşılıqlı hücumlar qururdu. 51-ci dəqiqədə Kuzmanoviçin zərbəsi təhlükləli oldu. Lakin Səlahət yerində idi. Yavaş-yavaş “Səbail” qonaqları əks-hücumlarda yaxalamağa çalışırdı. 78-ci dəqiqədə meydana sonradan çıxan Rüfətin zərbəsi dirəkdən döndü. Bir qədər sonra Pedro da şansını yoxladı. Lakin portuqaliyalının zərbəsi qapının üstündən keçdi.

Son dəqiqələrdə naxçıvanlılar bütün komanda ilə irəli atılsa da, istədiklərinə nail ola bilmədilər. Beləliklə, “Səbail” ardıcıl 4-cü qələbəsini qazanmaqla xalını 13-ə çatdırdı. Şahin Diniyevin komandası artıq 2-ci pillədə qərarlaşıb.

Gözdən qaçmadı
* Oyun başlamamış Şahin Diniyev qonaq komandanın ehtiyat oyunçular skamyasındakılarla görüşəndən sonra Azər Bağırovu qucaqlayaraq uğur arzuladı.
* Oyunu izləyənlər arasında “Xəzər Dəniz Gəmiçiliyi” QSC-nin sədri Rauf Vəliyev də var idi.
* Oyunu uzun fasilədən sonra “CBC Sport” kanalına dönən Gündüz Abbaszadə şərh edirdi. Məlumat üçün bildirək ki, həmkarımızın son iş yeri “Qarabağ” olub.
* Azər Bağırov tez-tez referi Rəşad Əhmədova etiraz edirdi. Lakin çalışdırıcı ehtiyat oyunçular skamyasında əyləşən köməkçilərinə və futbolçularına bunu etməyə imkan vermirdi.
* “Araz-Naxçıvan”ın qapısına penalti təyin olunarkən Azər Bağırov jurnalistlər tərəf dönərək “Allah hər şeyi görür”, - deyə üsyan etdi.
* Orxan Əliyev meydandan çıxandan sonra ehtiyat oyunçular skamyasının yanındakı oturacaqda əyləşərək əsəbini soyutmağa çalışırdı. Hücumçu qaçırdığı epizodların təəssüfümü yaşayırdı. Komandanın məşqçisi Rail Məlikov Orxana yaxınlaşaraq təsəlli verdi.

İLKİN SULTANLI