Türkiyə çempionatında istefaların ardı-arası kəsilmir.

“Football-plus.az” xəbər verir ki, məlum olduğu kimi, son turda “Ankaragücü” “Qalatasaray” ilə səfər oyununda hesabı açsa da, 1:2 hesabıyla uduzdu. Bu, Tolunay Kafkasın ankaralıların baş məşqçisi postunda son oyunu oldu. Hələ matçdan öncə də təcrübəli mütəxəssisin tezliklə istefaya göndəriləcəyi haqda xəbərlər yayılmışdı. “Ankaragücü” 7 oyuna topladığı 6 xalla (1 qələbə, 3 heç-heçə, 3 məğlubiyyət) 14-cü pillədə qərarlaşıb. Daha öncə 3 ilə yaxın Türkiyənin gənclər yığmasını çalışdıran Kafkas paytaxt təmsilçisinin başına bu ilin martında keçmişdi. Komanda həmin vaxtdan bəri 18-i superliqada, 3-ü ölkə kubokunda olmaqla keçirdiyi 21 qarşılaşmanın yalnız 6-da qələbə qazana bildi (6 heç-heçə, 9 məğlubiyyət). Yeri gəlmişkən, artıq “Ankaragücü”nün yeni baş məşqçisi bəllidi. Bu komandanı mövsümün qalan hissəsində Əmrə Belözoğlu çalışdıracaq. Dünən “Eryaman” stadionunda keçirilən tədbirdə Belözoğlu ilə ikiillik müqavilə imzalandı. Xatırladaq ki, 43 yaşlı mütəxəssis cari mövsümə “İstanbul BŞ”nin “sükanı arxasında” başlamışdı. Amma başakşəhərlilər mövsümə bərbad start verdiyindən Əmrə 4-cü turdan sonra istefaya göndərilmişdi. “Ankaragücü” onun məşqçi karyerasındakı 3-cü klub olacaq. Belözoğlu məşqçiliyə 2021/22-nin son 10 turunda “Fənərbaxça”nı çalışdırmaqla start vermişdi.

Bu arada Hüseyn Əroğlu ilə yollarını ayırandan sonra hələ də yeni məşqçi tapa bilməyən debütant “Samsunspor”da yeni təyinat rəsmiləşib. 11 ildən sonra qayıtdığı elitaya çox zəif start verən və 6 tura cəmi 1 xal topayaraq sonuncu pillədə qərarlaşan Samsun təmsilçisi Fuad Çapa ilə anlaşıb. Amma baş məşqçi yox, idman direktoru kimi. Samsunlular bu vəzifəyə əvvəlcə Atiba Hatçinsonu, sonra Mehmet Topalı gətirmək istəsələr də, karyerasını yenicə başa vurmuş hər iki futbol adamı təklifi geri çevirdi. Fuad Çapa üçün bu, tam yeni bir sahədi. İndiyə qədər bir çox klubu çalışdıran 55 yaşlı mütəxəssis daha öncə heç vaxt idman direktoru kimi işləməyib. Yeri gəlmişkən, onun sonuncu iş yeri elə “Samsunspor” olmuşdu. Çapa 2021-in oktyabrından 2022-nin aprelinə qədər samsunluların başında 25 rəsmi oyuna çıxmışdı. Baş məşqçi məsələsinə gəlincə, rəhbərlik Sərgən Yalçınla maliyyə məsələsində anlaşa bilmədisə, Aykut Kocaman artıq məşqçi kimi çalışmaq istəmədiyi üçün onun təyinatı baş tutmadı. Ən real namizəd Rza Çalımbay hesab olunur. Çalımbayın köməkçiləri hətta son turda “Samsunspor”un evdə “Qaziantep”ə uduzduğu oyunu tribunadan təqib etmişdi. Amma deyilənə görə, məşqçinin köməkçiləri klubun heyətinin hədsiz zəif olduğunu bildiriblər. Ona görə də Çalımbay təklifi qəbul etməyə tələsmir. Hələ ki, həftəsonu “Çaykur Riəzspor”a qarşı oyunda baş məşqçi vəzifəsini Fuad Çapa icra edəcək.