Türkiyə çempionatında 13-cü tura dünən keçirilən iki qarşılaşma ilə yekun vuruldu.

''Fənərbaxça'' demək olar, bütün ikinci hissəni azlıqda keçirməsinə baxmayaraq öz meydanında ''Sivasspor''u minimal hesabla məğlub etdi və DÇ ilə bağlı yaranacaq fasiləyə lider qismində yollanmağı rəsmiləşdirdi. Günün digər matçında isə sürpriz nəticə qeydə alındı. ''İstanbul BŞ'' ''Hatayspor''la səfər qarşılaşmasında bir ara 3:1 öndə olmasına baxmayaraq 1 xalla kifayətlənməli oldu (3:3). Oyundan sonra keçirilən mətbuat konfransında başakşəhərlilərin baş məşqçisi Əmrə Belözoğlu ilk hissədəki zəif futboldan və yekun nəticədən narazı qaldığını bildirdi. Toplantının gedişində bir telefondan gələn səsə əsəbləşən mütəxəssis salonu tərk edərkən bir jurnalistlə gərginlik yaşadı. Əlində telefonu tutaraq Belözoğlunu videoya çəkən həmin jurnalist məşqçiyə bunun sadəcə bir klaviatura səsi olduğunu deyərək onu məsələni çox şişirtməkdə günahlandırdı. Bunun davamında Əmrə həmin jurnalistdən nə üçün onu telefonla çəkdiyini soruşdu və səs tonunu yüksəltdi. Hansı media orqanının nümayəndəsi olduğu hələ ki bilinməyən jurnalist vəzifə borcunu yerinə yetirdiyini dedi və ''üstümə bağırmayın'' cavabını verdi. Əmrə də əsəbi şəkildə salonu tərk etdi.