2-ci turun ilk oyun günü baxımlı və məhsuldar oyunlara səhnə oldu.

"Football-plus.az" xəbər verir ki, “Braqa”, “Qalatasaray” və “Real” səfərdə əzmkar qələbə qazandı. Xüsusilə “Cim-Bom”un “Old Trafford”da dastan yazması uzun müddət unudulmayacaq. “İnter” və “Bavariya”dan fərqli “Arsenal” fanatlarına şok yaşatdı.

A qrupu
Mançester Yunayted – Qalatasaray 2:3 (1:1)
Mançester Yunayted (İngiltərə): Onana, Dalot, Lindelöf, Varan, Amrabat (Marsyal, 89), Kazemiro, Mecbri (Eriksen, 46), Maunt (Antoni, 85), Fernandeş, Reşford (Qarnaço, 68), Höylunn.
Qalatasaray (İstanbul, Türkiyə): Muslera, Boe, Əbdülkərim Bardakcı, Sançes, Anxelinyo (Ndombele, 84), Kaan Ayhan (Nelsson, 84), Torreyra (Oliveyra, 61), Tete (Barış Alpər Yılmaz, 61), Kərəm Aktürkoğlu, Zaha (Mertens, 72), İkardi.
Qollar: Höylunn, 17 (1:0). Zaha, 23 (1:1). Höylunn, 67 (2:1). K.Aktürkoğlu, 71 (2:2). İkardi, 81 (2:3).
İkardi 78-ci dəqiqədə penaltidən yararlana bilməyib (yan).
Vərəqələr: Torreyra, 31. Kazemiro, 34. Dalot, 38. Boe, 61. Oliveyra, 86 – sarı. Kazemiro, 77 – qırmızı (ikinci sarı).
Hakim: İvan Krujlyak (Slovakiya).
3 oktyabr. Mançester. 73204 tamaşaçı.
oyunun statistikası
16 (5) qapıya (“çərçivə”yə) zərbə 15 (4)
9 künc zərbəsi 3
4 ofsayd 0
13 qayda pozuntusu 16
3(1) sarı (qırmızı) vərəqə 3(0)
52 topa sahibolma (faizlə) 48

“Yunayted”in durumunu nəzərə alaraq futbolsevərlərin böyük maraqla gözlədiyi bu qarşılaşma Türkiyə çempionu üçün yaxşı başlamadı və Höylunn artıq 17-ci dəqiqədə Reşfordun köməyi ilə hesabı açdı. Amma çox keçmədən karyerasında ÇL-də ilk qolunu vuran Zaha sabiq klubunu və “Old Trafford”u susdurdu. Oyun meydan sahiblərinin hücumları şəraitində keçsə də, hiss olunurdu ki, qonaqlar rəqibin ad-sanından çəkinmir. Daha öncə “İstanbul BŞ”nin başında “Yunayted”i məğlub edən Okan Buruk komandasını bu oyuna yaxşı hazırlaşdırmışdı. Hətta 2-ci hissənin ortalarında Sançesin səhvindən sonra Höylunnun əla sürət nümayiş etdirərək 2-ci qolu vurması da qonaqları həvəsdən salmadı. Əksinə, “Qalatasaray” 1:2-dən sonra şou göstərdi. Qoldan cəmi 4 dəqiqə sonra Kərəm Aktürkoğlu Barış Alpər Yılmazın ötürməsini qola çevirdi. Maraqlıdı ki, avokuboklarda 5-ci dəfə fərqlənən Kərəm bu qolların hamısını səfərdə vurub. Çox keçmədən Onana hücuma ötürmə ilə başlayarkən kobud səhvə yol verdi. Kazemiro onun səhvini düzəltməyə çalışarkən həm penaltiyə səbəbkar oldu, həm də 2-ci sarı vərəqəni aldı. Düzdü, İkardi penaltini boşa verərək “çərçivə”yə düşmədi. Amma 3 dəqiqə sonra argentinalı forvard Onana ilə təkbətək qaldığı epizodda topu ustaca onun başının üzərindən atmaqla antiqəhrəmandan qəhrəmana çevrildi! İngiltərə klublarına qarşı səfərdə keçirdiyi 11-ci oyunda ilk qələbəsini qazanan “Cim-Bom”un qrupdakı durumu yetərincə yaxşı olsa da, əsas mübarizə hələ irəlidədi. Okan Buruk 2 fərqli komandanın başında “Yunayted”i məğlub edən 5-ci məşqçi kimi tarixə düşdü. “Qırmızı şeytanlar” son 25 ildə ilk dəfə ÇL-in qrupuna 2 məğlubiyyətlə start verib.

Kopenhagen – Bavariya 1:2 (0:0)
Kopenhagen (Danimarka): Qrabara, Ankersen, Diks (Lund, 78), Vavro, Melinq, Lerager, Falk, Qonsalveş (Oskarsson, 85), Elyunussi (Larsson, 85), Klasson, Aşuri (Bardaqji, 65).
Bavariya (Münhen, Almaniya): Ulrayx, Mazraui, Upamekano, Kim Min Çje, Devis, Kimmix, Laymer (Müller, 77), Sané (Tel, 78), Musiala (Qoretska, 78), Koman (Çupo-Motinq, 87), Keyn.
Qollar: Lerager, 56 (1:0). Musiala, 67 (1:1). Tel, 83 (1:2).
Vərəqələr: Melinq, 54. Lerager, 63. Musiala, 69. Vavro, 90+3 – sarı.
Hakim: Georgi Kabakov (Bolqarıstan).
3 oktyabr. Kopenhagen. 35690 tamaşaçı.
oyunun statistikası
11 (4) qapıya (“çərçivə”yə) zərbə 15 (5)
2 künc zərbəsi 8
1 ofsayd 1
10 qayda pozuntusu 11
3(0) sarı (qırmızı) vərəqə 1(0)
41 topa sahibolma (faizlə) 59

Bu qarşılaşmada bütün qollar fasilədən sonra vuruldu. Danimarka çempionunun müdafiəsini yarmaqda çətinlik çəkən “Bavariya” gözlənilmədən 2-ci hissənin əvvəlində hesabda geri düşdü. Amma Tuxelin komandası həm əzmkarlıq, həm də əvəzetmələr hesabına vəziyyəti dəyişə bildi. Buraxılan qoldan 11 dəqiqə sonra Almaniya futbolunun vunderkindi Musiala bir neçə rəqibin əhatəsində olmasına baxmayaraq, mükəmməl qol vurdu. Zatən böyük oyun üstünlüyünə malik olan və bərabərlik qolundan sonra psixoloji üstünlüyü də ələ keçirən Münhen nəhəngi matçın sonlarına yaxın rəqibi “ağ bayraq qaldırmağa” məcbur etdi. Sonradan meydana çıxan futbolçuların – Müllerlə Telin inamlı oyunu 2-ci qolun vurulmasına səbəb oldu. Müller ÇL-də 101-ci qələbəsini qazanmaqla Kasilyası yaxaladı. O, bu göstəricidə yalnız Kriştiano Ronaldodan (115) geri qalır. “Rekordmayster” ÇL-in qrup mərhələsinə aid olan birdən-birə 3 rekordu yenilədi! Komanda həm ardıcıl 15-ci qələbəsini qazandı, həm məğlubiyyətsiz seriyanı 36 oyuna (33 qələbə, 3 heç-heçə), həm də səfərdəki məğlubiyyətsiz seriyanı 18 oyuna (16 qələbə, 2 heç-heçə) çatdırdı. “Kopenhagen” isə ÇL-də Almaniya təmsilçilərinə qarşı keçirdiyi 13-cü qarşılaşmada da qələbəyə həsrət qaldı (4 heç-heçə, 9 məğlubiyyət).
1. Bavariya 2 2 0 0 6-4 6
2. Qalatasaray 2 1 1 0 5-4 4
3. Kopenhagen 2 0 1 1 3-4 1
4. Mançester Yunayted 2 0 0 2 5-7 0
Növbəti turun oyunları oktyabrın 24-də keçiriləcək: Qalatasaray – Bavariya, Mançester Yunayted – Kopenhagen.

Oyundan sonra...
Erik ten Haq, ''Mançester Yunayted''in baş məşqçisi: “Bu səhvlər psixoloji durumumuzdan qaynaqlanır. Bu səviyyədəki oyunlarda belə səhvlər yolverilməzdi. Çünki rəqib dərhal səni cəzalandırır. Fanatlarımız önündə iki dəfə hesabda önə keçsək də, yenə məğlub olduq. Bu, gözlədiyimiz nəticə deyil. Başverənlərə görə hər birimiz cavabdehlik daşıyırıq. Höylunn performansından razı qala bilər. Biz də ondan məmnunuq. Amma qələbə üçün kifayət etmədi. Pley-off şansımız azalsa da, hələ heç nə bitməyib. Nə etməli olduğumuzu bilirik. Onana başda olmaqla bəzi futbolçularla ciddi söhbət etməliyəm. Onana yaxşı qapıçıdı və ona dəstək verməliyəm”.

Okan Buruk, ''Qalatasaray''ın baş məşqçisi: “Rəqibdən çəkinmədik və öz oyunumuzu oynadıq. Hətta hesabda geri düşəndən sonra da. Belə çətin səfərdə sərgiləyə bildiyimiz maksimum futbolu ortaya qoyduq. Penaltini qaçırmasaydıq, burda 4 qol vurmuş olacaqdıq. Hərçənd ilk yarıda daha yaxşı oynaya bilərdik. Təbii ki, sevincliyik və qrupdan çıxmaq istəyirik. Amma sevinmək üçün elə də çox vaxtımız yoxdu. Artıq şənbə günü bizi növbəti oyun gözləyir. Bu mövsüm məğlubiyyətsiz yolumuza davam edirik. Bu çətin dönəmi mümkün qədər itkisiz keçmək istəyirik. Nəzərə alaq ki, hələ Ziyeş və Ndombele kimi oyunçularımız tam hazır deyil”.

Yakop Neestrup, ''Kopenhagen''in baş məşqçisi: ''Bu oyun bir daha göstərdi ki, biz bu turnirdə, xüsusilə də ev oyunlarında istənilən rəqiblə başabaş oynamağa qadirik. Bu gün “Bavariya”dan, demək olar, heç nədə geri qalmadıq. Nəticəni xırda detallar həll etdi. İki bərabər səviyyəli komandanın duelini izlədik”.

Tomas Tuxel, ''Bavariya''nın baş məşqçisi: “Kopenhagen”in evdə yaxşı oynadığını və işimizin çətin olacağını bilirdik. Konsentrasiyanı itirməmək çox vacib idi. Biz bunu bacardıq. Qol buraxandan sonra işimiz daha da çətinləşdi. Çünki rəqib müdafiədə boşluq vermirdi. Yerli fanatlar da öz komandalarını yaxşı dəstəkləyirdi. Amma böyük üstünlüyə malik idik və bilirdik ki, gec-tez əlimizə fürsət düşəcək. Həm sakitliyi qorumağımız, həm də sonradan meydana çıxanların uğurlu oyunu sayəsində matçın axarını öz xeyrimizə çevirə bildik”.