Okan Buruk ilk oyunla müqayisədə start heyətində üç dəyişiklik etmişdi.

“Football-plus.az” xəbər verir ki, Berkan Kutlu ilə Oliveyra ehtiyatda qalmışdısa, “Lester”ə transfer olunan Yunus Akgünün adı iştirak ərizəsinə salınmamışdı. Bu futbolçuları uyğun olaraq Torreyra, Kərəm Dəmirbay və Tete əvəzləmişdi. “Qalatasaray” üçün oyun yaxşı başladı. Artıq 7-ci dəqiqədə İkardi özü qazandığı penaltini dəqiq yerinə yetirdi. Təcrübəli forvard bununla da son 4 rəsmi oyunda 5-ci qolunu vurdu. Bundan sonra temp bir qədər aşağı düşdü. Ümumilikdə 2 top öndə olan “Cim-Bom” irəli getməyə tələsmirdi. Üstünlük əsasən “Molde”nin tərəfində olsa da, Musleranın qapısı önündə nadir hallarda təhlükə yaranırdı. Ururqvaylı qapıçı ilk yarıda yalnız bir dəfə - 30-cu dəqiqədə oyuna ciddi şəkildə qoşulmalı olaraq Hestadın yaxın məsafədən zərbəsi zamanı komandasını xilas etdi. “Qalatasaray” bundan əvvəlki iki mərhələdə ev oyunlarında ilk yarılarda vurduğu qollardan sonra müdafiədə etibarlı təsir bağışlayaraq qələbə hesabını qoruya bilmişdi. Amma bu dəfə bunu etmək mümkün olmadı. İkinci yarının ortalarına doğru təzyiqi artıran “Molde” Hestadla bərabərlik qolunu vurdu. Bu qoldan sonra Türkiyə çempionu təlaşa düşdü. Düzdü, Okan Burukun komandası əks-hücumlarda bir neçə dəfə yaxşı fürsət yaxaladı. Amma xüsusən Kərəm Aktüroğlunun son ötürmələri dəqiq olmurdu. 81-ci dəqiqədə “Rams Park”a toplaşan 50 minə yaxın azarkeşin ürəyi ağzına gəldi. Çünki Berişa qonaqları hesabda önə keçirdi. Amma VAR-ın müdaxiləsində sonra qol ofsayd üzündən qeydə alınmadı. Norveç çempionu son anları hücumda keçirdi. Amma qolu “Qalatasaray” vurdu. Əsas vaxta əlavə olunan 3-cü dəqiqədə Anxelinyonun cərimə zərbəsi zamanı top “canlı sədd”ə dayanan oyunçuya dəyərək istiqamətini dəyişdi və tora daxil oldu. İlk oyunda Oliveyra da cərimə zərbəsindən buna bənzər qol vurmuşdu. Beləliklə, “Qalatasaray”ın 3 mövsümlük həsrəti başa çatdı və komanda 2019/20-dən bəri ilk, tarixində isə 17-ci dəfə ÇL-in qrupuna vəsiqə qazandı. “Sarı-qırmızılar”ın bu qələbəsi sayəsində Türkiyə əmsallar cədvəlində Şotlandiyanı da geridə qoyaraq 9-cu pilləyə yüksəldi!

Xatırladaq ki, qardaş ölkə mövsümə 13-cü pillədə başlamışdı. Onu da bildirək ki, bu gün keçirilən püşkatma mərasimində “Qalatasaray” 4-cü səbətdə yer alıb.

pley-off, cavab görüşü
Qalatasaray – Molde (Norveç) 2:1 (ilk oyun – 3:2)
İkardi, 7-p. Anxelinyo, 90+3 – Hestad, 66.
Qalatasaray: Muslera, Boe, Nelsson, Əbdülkərim Bardakcı, Anxelinyo, Torreyra, Kərəm Dəmirbay (Berkan Kutlu, 90), Tete (Bakambu, 80), Mertens (Kaan Ayhan, 72), Kərəm Aktürkoğlu (Barış Alpər Yılmaz, 72), İkardi.
Faktlar
* “Qalatasaray” avrokuboklarda 308-ci oyununda 111-ci qələbəsini qazandı (82 heç-heçə, 115 məğlubiyyət, top fərqi – 413:453).
* “Qalatasaray” avrokuboklarda keçirdiyi son 18 oyunun yalnız birində məğlub olub (10 qələbə, 7 heç-heçə). Yeganə məğlubiyyət 2021/22-də AL-in 1/8 finalında “Barselona” ilə ev oyununda qeydə alınıb (1:2).
* “Qalatasaray” tarixində 17-ci dəfə ÇL-in qrup mərhələsinə vəsiqə qazandı. Maraqlıdı ki, Türkiyənin digər təmsilçiləri də ümumilikdə məhz 17 dəfə ÇL-in qrupunda oynayıblar (“Beşiktaş” 8, “Fənərbaxça” 6, “Trabzonspor”, “Bursaspor” və “İstanbul BŞ” hərəyə 1 dəfə)!
* “Qalatasaray” indiyə qədər 12 fərqli mövsümdə ÇL-in təsnifat mərhələsində mübarizə aparıb və bunlardan 10-da qrup mərhələsinə vəsiqə qazanmağı bacarıb. İstanbul nəhəngi yalnız 2008/09 və 2020/21 mövsümlərində təsnifat mərhələsini adlaya bilməyib.
* 10-cu dəfə ÇL-in təsnifatını uğurla başa vuran “Qalatasaray” bu göstəricidə 2-ci pillədə qərarlaşan “Rusenborq”a çatdı. Turnirin tarixində bu baxımdan yalnız Kiyev “Dinamo”su (15) hamını üstələyir.
* “Qalatasaray” ÇL-in təsnifat mərhələsi çərçivəsində keçirdiyi 32-ci oyunda 22-ci qələbəsini qazandı (7 heç-heçə, 3 məğlubiyyət).
* “Qalatasaray” son 15 ildə təsnifat mərhələsini uğurla keçərək ÇL-in qrupuna vəsiqə qazanan ilk Türkiyə təmsilçisi oldu! Sonuncu dəfə bunu 2008/09-da “Fənərbaxça” bacarmışdı.
* “Qalatasaray” avrokubokların pley-offunda ilk oyunda səfərdə qalib gəldiyi 15 halın hamısında mərhələni adlamağı bacarıb!
* “Qalatasaray” avrokuboklarda Norveç klublarına qarşı keçirdiyi 6-cı oyunda 3-cü qələbəsini qazandı (1 heç-heçə, 2 məğlubiyyət).
* “Qalatasaray” tarixində ilk dəfə avrokuboklarda ardıcıl 5 qələbə qazandı! Okan Buruk da uyğun olaraq klub tarixində bunu bacaran ilk məşqçi oldu. Buna qədər “Cim-Bom”un Avropada 2 dəfə - 2008-də Mihael Skibbe və 2009-da Frank Raykaardın başçılığı altında 4 oyunluq qələbə seriyası olmuşdu.
* İkardi ardıcıl 3-cü avrokubok oyununda qol vurmağı bacardı. Onun karyerasında sonuncu dəfə belə seriya 2019-un oktyabr-noyabrında PSJ-nin heyətində olub.