A seriyasının 7-ci turunda diqqəti daha çox cəlb edən oyunlar şənbə günü keçirildi.

“Football-plus.az” xəbər verir ki, bu liqanı Çempionlar Liqasında (ÇL) təmsil edən 4 komanda meydana məhz həmin gün çıxdı. Onlardan ikisi bir-birinə qarşı oynadı. Qeydə alınan nəticələrdən sonra liderlər qrupunda vəziyyət dəyişmədi. Ona görə ki, həm “İnter”, həm də “Milan” qələbə qazandı. Başqa sözlə, milanlılar şərikli liderliyi davam etdirir.

Əvvəlki turun ev oyununda “Sassuolo”ya uduzan (1:2) “İnter” vahid liderliyi əldən vermişdi. Mövsümün əvvəlindən başlayan qələbə seriyası qırılan “qara-göylər” Salernodakı matça Lautaro Martinessiz çıxmışdılar. Simone İnzaqi komandanın əsas hücumçusuna ÇL-in “Benfika” ilə oyunu ərəfəsində az-çox istirahət verməyi lazım bilmişdi. Argentinalının yoxluğunda qapıya yol tapmaqda çox çətinlik çəkən milanlılar belə gedişlə növbəti dəfə büdrəyə bilərdilər. Lakin Lautaronun 2-ci hissədə meydana çıxması komandasının hücum xəttini sanki qəflət yuxusundan ayıltdı. Qonaqlar məhz onun fenomenal qol duyumu sayəsində 4:0 hesabıyla qalib gəldilər. “İnter” zirvədəki yerini qorudu.

Amma əzəli rəqib də qalib gəldiyindən İnzaqinin komandası vahid liderliyə nail ola bilmədi. “Milan”ın rəqibi olan “Latsio” hələ ki bu mövsüm qeyri-sabit komanda kimi xatırlanır. Romalılar ev sahiblərinin hücumlarına yalnız bir saat tab gətirə bildilər. Nəhayət, Pulişiç hesabı açdı. Onun kimi komandaya bu yay transfer olunan Okafor isə sona yaxın milanlıların qələbəsinə şübhə yeri qoymadı. Hər iki qolun ötürməsini verən Leaonun vacib oyunu yüksək səviyyədə keçirdiyini də bildirək. Stefano Pyolinin komandası “İnter” ilə daban-dabana irəliləyir.
“Napoli” mövsümün əvvəlində çox yaxşı təsir bağışlayan “Leççe”dən səfərdə 3 xal almaqda elə bir çətinlik çəkmədi. Əvvəlki turda çemionatdakı qələbəsiz oyunlar seriyasının 4-ə çatmasına imkan verməyən son çempion 4 cavabsıq qolla qalib gəldi. Rudi Qarsiyanın komandası inamlı qələbə ilə 5-ci yerdən 3-ə yüksəldi.

Çünki Berqamoda “Atalanta” ilə “Yuventus” arasında keçirilən oyunda hesab açılmadı. İki xal itkisi qonaq komandanın topların fərqinə əsasən bir pillə geriləməsini qaçılmaz etdi.

7-ci tur
Leççe – Napoli 0:4
Estiqor, 16. Osimhen, 51. Qaetano, 88. Politano, 90+5-p.
Napoli: Meret, Olivera, Natan, Estiqor, Di Lorentso, Zyelinski (Qaetano, 83), Lobotka (Kayuste, 75), Zambo Angissa, Kvaratsxeliya (Politano, 58), Lindstrem (Raspadori, 58), Simeone (Osimhen, 46).
Milan - Latsio 2:0
Pulişiç, 60. Okafor, 88.
Milan: Menyan, Ernandes, Tomori, Kyaer, Kalabriya (Florentsi, 70), Reynders, Adli (Pobeqa, 70), Loftus-Çik (Musa, 29), Leao, Pulişiç (Çukvueze, 82), Jiru (Okafor, 79).
Latsio: Provedel, Hüsay, A.Romanyoli, Kazale, Maruşiç, Luis Alberto, Rovella (Vesino), Genduzi (Kamada, 67), Zakkanyi (İsaksen, 82), Felipe Anderson (Pedro, 75), Kastelyanos (İmmobile, 75).
Salernitana - İnter 0:4
Martines, 62; 77; 85-p.; 89.
İnter: Zommer, De Vrey, Açerbi, Pavar, Auqusto, Klassen (Asllani, 54), Çalhanoğlu (Mxitaryan, 54), Barella (Aqume, 86), Dyumfris (Darmian, 79), Sançes (Martines, 54), Türam.
Atalanta - Yuventus 0:0
Atalanta: Musso, Skalvini (Kolaşinats, 65), Cimşiti, Toloy, Rucceri (Bakker, 86), Ederson, De Roon, Zappakosta (Holm, 82), Lukmen (Muriel, 65), Koopmeyners, De Ketelare (Paşaliç, 82).
Yuventus: Şçensnı, Danilo, Bremer (Ruqani, 84), Qatti, Makkenni (Vea, 84), Facoli (Miretti, 68), Lokatelli, Rabyo, Kambyaso (Kostiç, 68), Kyeza, Ken (Yıldız, 75).
Roma – Frozinone 2:0
Lukaku, 22. Lorentso Pelleqrini, 83.
Roma: Patrisio, Ndika, Kristante, Mançini, Spinatsola, Karsdorp (Kristensen, 70), Paredes, Bove, Lorentso Pelleqrini (Auar, 86), Dibala (Azmun, 90+1), Lukaku.
Bolonya - Empoli 3:0
Orsolini, 21; 66; 90+3.
Udineze - Cenoa 2:2
Lukka, 23. Matturro, 90+1-öz qapısına - Qudmundsson, 14; 41.
Torino – Verona 0:0
Sassuolo – Montsa 0:1
Kolombo, 66.
Fiorentina – Kalyari 3:0
Qonsales, 3. Dossena, 21-öz qapısına. Nzola, 90+4.

1. İnter 7 6 0 1 19-3 18
2. Milan 7 6 0 1 15-8 18
3. Napoli 7 4 2 1 16-6 14
4. Yuventus 7 4 2 1 12-6 14
5. Fiorentina 7 4 2 1 15-10 14
6. Atalanta 7 4 1 2 11-5 13
7. Leççe 7 3 2 2 8-9 11
8. Bolonya 7 2 4 1 6-4 10
9. Frozinone 7 2 3 2 9-10 9
10. Torino 7 2 3 2 6-7 9
11. Sassuolo 7 3 0 4 11-13 9
12. Montsa 7 2 3 2 5-7 9
13. Roma 7 2 2 3 15-11 8
14. Cenoa 7 2 2 3 10-11 8
15. Verona 7 2 2 3 4-6 8
16. Latsio 7 2 1 4 7-10 7
17. Udineze 7 0 4 3 4-12 4
18. Empoli 7 1 0 6 1-16 3
19. Salernitana 7 0 3 4 4-14 3
20. Kalyari 7 0 2 5 2-12 2
Bombardirlər: Martines (İnter) - 9, Osimhen (Napoli) - 5.
Növbəti turun oyunları oktyabrın 6-8-i aralığında keçiriləcək: Empoli – Udineze, Leççe – Sassuolo, İnter – Bolonya, Yuventus – Torino, Cenoa – Milan, Montsa – Salernitana, Frozinone – Verona, Latsio – Atalanta, Kalyari – Roma, Napoli – Fiorentina.

Turun rəqəmi
4 - Martines komandasının Salernoda büdrəməsinə imkan vermədi. “İnter”in 4 cavabsız qolla qalib gəldiyi matçda qolların hamısını 55-ci dəqiqədə meydana çıxan hücumçu vurdu. Mübarizəyə sonradan qoşulan və 27 dəqiqəyə poker edən dünya çempionu İtaliya çempionatında bu statistikanın aparıldığı 1994/95 mövsümündən sonra buna nail olan ilk futbolçudu.

Turun ulduzu
Lautaro Martines (İnter) – “Bolonya”nın “Empoli”ni 3:0 hesabıyla məğlub etdiyi oyunda bütün qolları vuran Rikkardo Orsolininin bəxti gətirmədi. Ona görə ki, turun ən yaxşı oyunçusu adına Martines daha layiq idi. Bu mövsüm qollarının sayını 9-a çatdıran Lautaro bombardirlər siyahısındakı liderliyini möhkəmləndirdi.

Turun sitatı
Joze Mourinyo, “Roma”nın baş məşqçisi: “Dibala cümə axşamı oynamayacaq. O, bu gün ən yüksək səviyyədə futbol sərgilədi. Mənə meydana çıxmaqda çətinlik çəkdiyini desəydi, ondan yararlanmazdım. Amma Paulo mənə fərqli fikir bildirdi. Bu gün qalib gəlməsəydik, Kolizey partlayardı. Bunun baş verməməsi üçün Dibalanı meydana buraxmışdım. Amma Avropa Liqasının növbəti oyununda görünməyəcək”.