Ötən mövsüm ölkə kubokunun qalibi olan “Gəncə”də böyük dəyişikliklər vaş verdi.

Əvvəlki saylarımızda da məlumat verdiyimiz kimi, komanda yeni mövsüm üçün türkiyəli Levent Bedri Meriçə tapşırıldı. Təyinatla bağlı 40 yaşlı mütəxəssislə əlaqə saxladıq.

- "Gəncə"yə gəlişiniz necə alındı və ilk təklifi kimdən aldız?
- Ötən mövsümdən Azərbaycan basketbol çempionatını izləyirdim. Əsas da pley-off və final matçlarını. Burda türkiyəli mütəxəssis dostlarım da var idi. Həm də 2007-ci il təvəllüdlü oğlum Dərin Berköz Azərbaycanda oynamaq üçün vətəndaşlıq almalıydı. Onunla birgə Bakıya gəldiyimiz vaxt federasiyadan belə təklif oldu. Mən də sizin liqanı izlədiyim, tanıdığım üçün anlaşdıq. Bu təklif gələndə “Gəncə” artıq keçmiş baş məşqçisi ilə də yollarını ayırmışdı.

- Türkiyə basketbolu səviyyə baxımından Azərbaycan basketbolundan çox fərqlənir. Maraqlıdı, oğlunuz niyə Türkiyədə yox, ölkəmizdə oynamağı seçdi?
- Oğlum çox yaxşı oyunçudu. Türkiyə millisinin təlim-məşq toplanışına da seçilmişdi. Biz onun Avropaya daha rahat getməsi, orda təhsil alması üçün Azərbaycanı seçdik. Bilirsiz ki, sizin vətəndaşlığı alanda digər ölkələrdə rahat hərəkət etmək olur. Türkiyədə isə bu işlər çətin olur.

- Komandanın heyətini tam komplektləşdirmisiz?
- Bəli, heyətimizi tam qurmuşuq. 6 amerikalı və 6 yerli oyunçumuz var. Hamısı da gəncdi. İndiyədək böyük beynəlxalq yarışlarda təcrübə yaşamayıblar. Ötən mövsüm bu komandanın heyətində Amil Həmzəyev və digər güclü oyunçular çıxış edib. Lakin bu mövsüm tam fərqli olacaq. Əsas fikrimizi yerli və gənc basketbolçuların inkişafına yönəldəcəyik.

- Özünüz də dediz ki, ötən mövsüm “Gəncə”nin heyətində önəmli oyunçular olub. Bəs siz o heyətdən kimləri kollektivdə saxlamaq istəyərdiz?
- Mən gələndə artıq oyunçular komandanı tərk eləmişdi. Ona görə kimi heyətdə saxlamaq istəyərdim? Amil Həmzəyev kimi təcrübəli, karyerası zəngin olan bir oyunçunu hər baş məşqçi heyətində görmək istəyər. Bildiyim qədəri ilə o da gəncəlidi. Lakin bizim bu mövsüm üçün planlarımız başqadı. Gənc oyunçulara şans vermək niyyətindəyik. Amerikalı basketbolçuları da elə seçdik. 6 nəfərdən dördü oxuduqları kolleclərin komandasında mübarizə aparıblar. Yalnız ikisi Portuqaliya və Meksika çempionatında çıxış edib.

- Legionerlər sizin istəyinzlə komandaya cəlb olunub, yoxsa rəhbərliyin seçimidi?
- Xeyr, bütün legionerlər mənim istəyimlə transfer olunub. Çünki bura gətirdiyim basketbolçuların qiyməti o qədər də baha deyil. Və məqsədim bu oyunçulara da kömək etməkdi.

- Ötən mövsüm “Gəncə” ölkə kubokunun qalibi olmuşdu. Bəs bu mövsüm gənc oyunçularla hədəfləriniz nədi?
- Məqsəd azarkeşlərimizə yaxşı oyun göstərməkdi. Çempionatda və ölkə kubokunda sona kimi mübarizə aparacağıq. Azarkeşlərimiz bundan əmin olsun ki, qalib gəlsək də, uduzsaq da, oyunçularımız sona kimi mübarizə aparacaq. İstəyimiz kubok qazanmaqdı. Bunun üçün də çalışacağıq.

- Sizcə, bu mövsüm “Gəncə”yə başağrısı olacaq komandalar hansılardı?
- Daha əvvəl də sizin liqanı izlədiyim üçün rəqibləri, oyunçuları tanıyıram. “Sabah” çempionatın ən büdcəli və güclü klublarından biridi. Həm də bu mövsüm avrokuboklarda oynayacaqlar. NTD, “Neftçi” kimi komandalar da yaxşı transferlər həyata keçirdilər. Bir də “Ankaragücü”də birlikdə çalışdığım, “Xəzri”nin baş məşqçisi Murat Dikmən də əla komanda qurub. Məncə, bu rəqib daha təhlükəlidi.

- Azərbaycan və Türkiyə basketbolu arasında nə kimi fərqlər var?
- Təcrübəyə, yaxşı salonlara ehtiyac var. Federasiya orta məktəblərlə sıx əlaqədə olmalı, basketbola həvəs göstərən istedadlı uşaqları üzə çıxarmalıdı. Məsəsələn, Türkiyədə Gənclər Liqası var. Orda aşağı yaş qruplarında olan basketbolçular çıxış edir. Gələcək üçün oyunçu yetişdirmək istəyiriksə, aşağı yaş qruplarını inkişaf etdirmək, onlarda rəqabəti artırmaq və gənclərin oynamasına şərait yaratmaq lazımdı. Mənim də hazırda Azərbaycanda gördüyüm əskiklər bunlardı.

- Gənc basketbolçularla işləyəcəksizsə, klubla bağlı gələcək planlarınız varsa, niyə birillik müqavilə imzalamısız?
- Bu, federasiyanın qərarıdı. Amma inanıram ki burda yaxşı işlər görüb növbəti mövsüm də yolumuza “Gəncə” ilə davam edəcəyik. Mənim bu məsələ ilə bağlı ağlımda sual işarəsi yoxdu.

- Oğlunuz Dərin Berközü gələcəkdə “Gəncə”yə transfer etmək niyyətiniz varmı?
- Oğlum iki il sonra universitet oxumağa gedəcək. Öncəliyimiz Dərinin Avropada və ya Amerikada təhsil almasıdı. Ona xarici klublardan da təkliflər gəlir. Təhsilini bitirəndən sonra niyə də “Gəncə” çıxış etməsin?! Çünki Azərbaycan vətəndaşıdı. Burda yerli statusunda oynayacaq. Onun gələcəkdə Azərbaycan millisinin şərəfini qoruyacağını düşünürəm. Lakin hələ ki Türkiyədə oxuyur.

- Hazırkı maliyyə durmunuz necədi? Belə görünür ki, ötən mövsümdən fərqli bu il aşağı büdcə ilə çıxış edəcəksiz?
- Ötən mövsümdəki büdcədən xəbərdar olmadığımdan bu baraədə nəsə deyə bilmərəm. Ona görə də ötən ildən az və ya çox olduğu haqda fikir səsləndirmirəm. Lakin basketbolçularımız “Sabah”, “Neftçi”, NTD kimi klubların heyətində çıxış edən oyunçulardan daha az qazanacaq. Hazırda bütün maliyyə dəstəyini federasiyadan alırıq. Azərbaycanda yaxşı şirkətlər var. Onlar basketbola pul ayırmalıdı. Buna etmədikləri üçün bütün güc federasiyanın üzərinə düşür.

- Siz və legioner oyunçular Gəncədə qalacaqsız?
- Bəli, oyunçularla birlikdə Gəncədə yaşayacağıq. Şəhər möhtəşəmdi. İlk dəfə burda oluram. Şəhərinizin tarixi ilə də daha əvvəl maraqlanmışdım. Burda oyunlarımızı keçirəcəyimiz salon da təmir edilib. Azərkeşlərimiz dəstəyi bizim üçün önəmlidi. Doğma meydandakı matçlara favorit kimi çıxacağıq.

CAVİD ƏLİYEV