Bir ay öncə yeni müqavilə imzalayan futbolçu ''Qalatasaray''ı tərk edir!

Aleksey Batrakov ilə anlaşan ''Qalatasaray''da sürpriz bir ayrılıq reallaşmaq üzrədi.

Mario Lemina ən qısa müddətdə komandanı tərk edə bilər. İlk baxışdan burda qeyri-adi bir şey olmasa da, təcrübəli futbolçunun bir ay öncə yeni müqaviləyə imza atdığını xatırladaq. İstanbul nəhəngi iyulun 21-də Lemina ilə ikiillik yeni müqavilə imzalandığını açıqlamışdı. Buna baxmayaraq onun ''Əl-Şabab'' ilə anlaşdığı bildirilir.

Görünür, ərəblərin milyonları 32 yaşlı futbolçu üçün daha cəzbedici variantdı. Onun Türkiyədə illik maaşı bonuslarla birlikdə 3,5 milyon avrodusa, ''Əl-Şabab'' Leminaya 6 milyon avro təklif edib. ''Qalatasaray'' da təbii ki, satışdan müəyyən məbləğ qazanacaq. Ancaq məbləğin həcmi barədə məlumat yoxdu. Leminanın yeni klubu ilə ikiillik anlaşma əldə etdiyi bildirilir.

''Cim-Bom''da ikinci dönəmini keçirən bu futbolçu indiyə qədər bu klubda 86 rəsmi oyunda aktivinə 5 qol, 4 məhsuldar ötürmə yazıb.

Ümumiyyətlə, bu transfer dönəminin sonuna qədər Türkiyə çempionu daha bir neçə önəmli oyunçusunu itirə bilər. Çünki Lukas Torreyra ilə Davinson Sançesin də ayrılması gündəmdədi.