''Fənərbaxça''nın gənc ulduzu Arda Gülər adından söz etdirməkdə davam edir.

Son matçlarda öz oyunu ilə diqqət çəkməyi bacaran 2005 təvəllüdlü yarımmüdafiəçi şərəfini qoruduğu Türkiyənin U-17 yığmasında da uğurlu çıxış edir. Qardaş ölkənin bu yaş qrupu may-iyunda keçiriləcək AÇ-2022-nin seçmə mərhələsinin elit turunda çıxışını davam etdirir. ''Ay-ulduzlular'' Serbiya, Uels və Sloveniya ilə birlikdə 7-ci qrupda çıxış edirlər. Bu qrupun oyunları Sloveniyada keçirilir. Arda Gülər Serbiyaya qarşı ilk matçda qol vursa da Türkiyə 2:3 hesabı ilə məğlub oldu. Amma martın 26-da Uelsə qarşı oyun çox uğurlu alındı. Bir çox skautların izlədiyi oyunda Arda 1 qol, 1 məhsuldar ötürmə ilə yadda qaldı və Türkiyə 5:2 hesabı ilə üstün oldu.

Zatən ''Fənər''dəki çıxışı ilə artıq tanımağa başlayan Gülər bu turnirdə də seçilməyi bacarır. Türkiyə mətbuatının yazdığına inansaq, ''Yuventus'', ''Bavariya'', ''Barselona'', ''Mançester Siti'', ''Arsenal'', ''Ayaks'', ''Atalanta'' başda olmaqla Avropanın bir çox klubunun skautları elit turun matçlarını diqqətlə təqib edir. Onlar Ardanı yaxından izləniləcək futbolçuların siyahısına salıblar. 2 oyuna 3 xalı olan Türkiyənin U-17 yığması qrupda son matçını sabah meydan sahibi Sloveniyaya qarşı keçirəcək.