“Qarabağ” nə üçün “Azersun Arena”nı seçib? - AÇIQLAMA
Misli premyer-liqasının qalibi “Qarabağ” Çempionlar Liqasının təsnifat mərhələsinin ilk oyunlarını “Azərsun Arena”da keçirəcək.
"Football-plus.az" xəbər verir ki, bu məlumatı mediaya açıqlamasında klubun direktoru Əmrah Çəlikəl verib. Buna səbəb Tofiq Bəhramov adına Respublika stadionunun təmirə bağlanmasıdı. Görəsən, arenada hansı təmir işləri görüləcək? Bu sualı Gənclər və İdman Nazirliyinə ünvanladıq. Qurumun mətbuat xidmətindən verilən rəsmi cavab belə oldu:
“Tofiq Bəhramov adına Respublika stadionunun ot örtüyü yenilənir. Buna səbəb hazırda örtüyün istismara yararsız olmasıdı. Meydana müntəzəm müasir standartlara uyğun xidmət göstərilir. Lakin stadionun torpaq qatı və ot örtüyü son dəfə əsaslı şəkildə 2012-ci ildə yenilənib. Beynəlxalq təcrübədə belə yenilənmələr 5-6 ildən bir aparılır. Uzunmüddətli istifadədən sonra stadionun ot örtüyünün yenilənməsinə ehtiyac var idi. Buna görə də “Sabah" - “Beşiktaş” oyunundan sonra ot örtüyünün dəyişdirilməsi prosesinə başlanılıb. Meydan tam bərpa olunandan sonra, avqustun ortalarında istifadəyə verilməsi nəzərdə tutulub”.
Burdan belə başa düşülür ki, arena avqustun ortalarında tam hazır vəziyyətdə olacaq. Bu səbəbdən də “Qarabağ” ÇL-də ilk iki təsnifat mərhələsinin oyununu “Azərsun Arena”da keçirəcək. Nəzərə alaq ki, turnirin 1-ci təsnifat mərhələsinin oyunları iyulun 11-12-si və 18-19-da keçiriləcək. 2-ci mərhələ matçları isə iyulun sonunda və avqustun əvvəlində baş tutacaq. Belədə “Qarabağ”ın əsası var ki, UEFA-ya “Azərsun Arena”nı sifariş etsin.
Bəs nə üçün bu stadion? Nəzərə alaq ki, “Qarabağ”ın ÇL-in təsnifat mərhələsindəki oyunlarını ən azı 20 min azarkeş izləyir. Suraxanıdakı stadion 4677 nəfərlikdi. Belə aşağı tutum azarkeşlər arasında ciddi narazılıq yaradacaq. Görəsən, nədən belə seçim edilib? Sualımızı klubun mətbuat xidmətinin rəhbəri Gündüz Abbaszadəyə ünvanladıq:
“Nə üçün sırf “Azərsun Arena”nı seçimişik? Bizə doğma olan arenadı. Sırf öz stadionumuzdu. İndiki məqamda başqa variant yalnız Bakı Olimpiya Stadionudu. Təsnifat mərhələsində həmin arenanın dolacağını fikirləşmirik. “Dalğa Arena”nın da xidmətindən bir neçə klubun istifadə etmək ehtimalı var. Belədə sıxıntı yarandı. Son variant kimi “Azərsun Arena”nı seçmişik. Razıyam ki, ÇL-in təsnifat mərhələsindəki oyunlarımıza 20 mindən çox azarkeş gəlir. “Tofiq Bəhramov”dan sonra irihəcimli arena təkcə BOS-du. Ehtimallarımız belədi ki, həmin görüşlərdə Bakı Olimpiya Stadionu dolmayacaq, boş tribunalar önündə oynayırmışıq kimi görünəcək”.
İLKİN SULTANLI
Digər xəbərlər
