Oyun möhtəşəm ab-havada start götürdü.

İlk dəqiqələrdən azərbaycanlı azarkeşlərin mükəmməl dəstəyi hiss olunurdu. Stadionda əsl çempionların mübarizəsinə layiq atmosfer var idi. “Qarabağ”ın müdafiəsindəki problemlər ilk dəqiqələrdən açıq-aşkar hiss olunurdu. Veşoviçin bir gün əvvəlki məşqdə zədələnməsi işləri lap korlamışdı. Onun mövqeyində çıxış edən Toralın matçın əvvəlindən ikili mübarizələrdə rəqibə uduzması heç də xoş mənzərə deyildi.

Etiraf etmək lazımdı ki, ilk 15 dəqiqə meydan sahiblərinin üstünlüyü şəraitində keçdi. Ağdamlılar heç cür topa nəzarət edə bilmirdi. Lakin vaxt keçdikcə “köhlən atlar” özünə gəlməyə başladı. Çempionumuz 24-cü və 33-cü dəqiqələrdə Leandro ilə qola çox yaxın oldu. Hələ tirdən qayıdan top azarkeşlərə saç-baş yoldurdu.

İlk hissənin ikinci yarısında ağdamlılar üstün oyun sərgiləsələr də, hesab açılmadı. Fasilədən sonra da üstünlük “köhlən atlar”ın tərəfində idi. Lakin bu cəmi 6-7 dəqiqə çəkdi. 55-ci dəqiqədə Elvinlə Şahruddinin anlaşmazlığı üzündən “Qarabağ” yersiz qol buraxdı. Burda müdafiəçinin səhvi bir idisə, Şahruddində bu pay üç idi. Çünki qolkiper topun istiqamətinə nəzarət edə, əlində saxlaya, Elvinə isə “mən götürürəm” deyə bilmədi.

Qoldan sonra “köhlən atlar” toparlanmaq əvəzinə bir qədər də ruhdan düşdü. Əslində Yankoviç nələrsə etməyə çalışırdı. Lakin komandanın oyununda eniş var idi. Şahruddinin də şousu kollektivə daha çox təsir edirdi. Elvinin 70-ci dəqiqədə zədələnərək meydandan çıxması vəziyyəti bir qədər də pisləşdirdi. Elə 1 dəqiqə sonra sağ cihandan ötürmədən sonra Fabian başla topu qapıdan keçirdi. Burda Şahruddinin nə etmək istədiyini heç kim başa düşmədi. Şərhçi Elnur Məmmədli demişkən, “belə qolları mən məktəbdə futbol oynayanda buraxırdım”.

Açığı, 0:2-dən sonra hər şeyin bitdiyini düşünsək də, vəziyyət bu qədər faciəvi deyilmiş. “Qarabağ” dərhal hücuma atılaraq 4 dəqiqə ərzində iki möhtəşəm qol vurdu. Hər iki epizodda da qəhrəman Cica idi. O, dubl edərək hesabı bərabərləşdirdi.

Qurban Qurbanov dəyişikliklər edərək oyunda tam geridönüş etmək istəsə də, Şahruddin ona mane oldu. Qarşılaşmaya əlavə olunan 1-ci dəqiqədə yeni transfer Kittel möhtəşəm zərbə ilə komandasına qələbə qazandıran qolu vurdu. Burda da qolkiperimiz topa gec reaksiya verdiyi üçün rəqib fərqlənə bildi. Amma adamın üstündə Allah var. Zərbə də çox möhtəşəm idi.

Beləliklə, Şahruddinin sayəsində “Qarabağ” səfərdən 3:2 hesablı məğlubiyyətlə dönür. “Rakuv” o qədər də böyüdüləsi rəqib deyil. Qurban Qurbanov komandanın səhvlərini təhlil etsə, Şahruddinin belə yersiz səhvlərinə çarə tapa bilsə, Bakıda qələbə qazanaraq növbəti mərhələyə keçən “Qarabağ” olacaq. Cavab görüşü isə avqustun 2-d’ Bakı Olimpiya Stadionunda keçiriləcək.

Gözdən qaçmadı
* "Qarabağ"ın prezidenti Tahir Gözəl də oyunu stadiondan izləyirdi. O, görüşdən əvvəl paltardəyişmə otağında olub, komandanın baş məşqçisi Qurban Qurbanov və futbolçular ilə görüşüb. Klub prezidenti komandaya dəstəyini nümayiş etdirib.
* Qarşılaşmanı 250 nəfərə yaxın azərbaycanlı azarkeş izləyirdi. Onların fəallığı “CBC Sport” ekranından belə hiss olunurdu. Soydaşlarımızın komandaya dəstəyi, “Azərbaycan” sədaları açıq-aşkar eşidilirdi.
* Matçın 44-cü dəqiqəsində azərbaycanlı azarkeşlər “Şəhidlər ölməz, vətən bölünməz” şüarını səsləndirdi.
* İlk hissə bitən kimi Şahruddin topdaşıyan uşaqlarla söhbətləşdi. Yekunda onlardan birinin başından öpərək “dəri kürə”ni ona verdi. İkinci hissənin əvvəlində uşaqlardan biri topu Elvinə vermək istəmədi. Millimizin üzvü onun üstünə qışqıraraq topu verməsini tələb etdi. “Rakuv”un fiziki hazırlıq üzrə məşqçinin tələbindən sonra topdaşıyan “dəri kürə”ni Elvinə verdi.
İLKİN SULTANLI