Çenstoxovadakı oyundan sonra bəlli idi ki, Bakıda qarşılaşmaya ağdamlılar daha istəkli başlayacaq. Bütün tənqidlərə rəğmən, həmin oyunun "qəhrəmanı” Şahruddin yenə əsas heyətdə yer almışdı.

"Football-plus.az" xəbər verir ki, Qurban Qurbanov, ümumiyyətlə, ilk "11-liy"i dəyişməyi lazım bilməmişdi. İlk 15 dəqiqədə topa ancaq "köhlən atlar" nəzarət etdi. Qonaqlar isə ağdamlıların səhvlərindən yararlanmağa, əks-hücumlar qurmağa çalışırdı. "Qarabağ" daha çox cinahlara meyl edirdi. Solda Zubir, sağda Leandro "Rakuv" müdafiəçilərinə çətin anlar yaşadırdı. Bütün bunlara baxmayaraq, rəqibin sıx müdafiəsini yarmaq alınmırdı.

Yavaş-yavaş "Rakuv" futbolçularında özünəinam artırdı. Qonaqlar artıq hücumlar qurmağa çalışırdı. Görüşdə ilk təhlükəli vəziyyəti də polşalılar yaratdı. 24-cü dəqiqədə müdafiənin arxasına atılan topu Çebulya qəbul edərək irəlilədi. Lakin Medina cəld davranaraq vingerin fərqlənməsinə imkan vermədi.

Matçın ilk üçdəbir hissəsi o qədər də maraqlı keçmədi. Azarkeşlər hər iki tərəfin ehtiyatlı oyununa şahidlik edirdi. Lakin 31-ci dəqiqədən sonra ağdamlılar təzyiqi artırdı. Həm sağ, həm də sol cinahdan qapı istiqamətinə asmalar olsa da, sonda bu ötürmələri zərbə ilə tamamlamaq mümkün olmurdu. Zaman keçdikcə "Qarabağ"ın topa nəzarəti daha da artırdı. Lakin "köhlən atlar" istədiyi kimi hücum qura bilmirdi. 43-cü dəqiqədə Toralın sağ cinahdan ötürməsinə toxuna bilən olmadı. İlk hissəyə əlavə olunan 3-cü dəqiqədə isə ankoviçin uzaqdan zərbəsini Kovaçeviç çətinliklə dəf etdi. Beləliklə, 45 dəqiqə ərzində qapılara qol vurulmadı.

Fasilədə komandalar hansısa dəyişiklik etmədi. İkinci hissə başlayan kimi ağdamlılar hücuma atıldı. 46-cı dəqiqədə Benzya yenə diqqət mərkəzinə düşdü. Onun zərbəsinin qarşısını Kovaçeviç çətinliklə aldı. 52-ci dəqiqəsində isə hesab açıldı. Topla bir qədər reyd edən Tudor qüvvətli zərbə ilə Şahruddini məyus etdi.

Ağdamlılar qoldan sonra həvəsdən düşmədilər, daha kəsərli hücumlar qurmaq üçün topu özündə saxlayaraq cinahlara meyl etdilər. 60-cı dəqiqədə isə hesab bərabərləşdirdi. Elvinin ötürməsinu Cica bir toxunuşla qapıya göndərdi. Bu, albaniyalının Çempionlar Liqasının cari mövsümündə 5-ci, sonradan aydın olacaqdı ki, həm də sonuncu qolu idi.

Azarkeşlərin möhtəşəm dəstəyi ilə ağdamlıların daha da fəallaşdı. 62-ci dəqiqədə Toral qola yaxın oldu. Onun asması qapıya doğru yönəlsə də, son anda Kovaçeviç topun qapıdan keçməsinə imkan vermədi. Bundan sonra "Rakuv" bir qədər fəallığı artırdı. Lakin "Qarabağ" müdafiəsi etibarlı oynayaraq növbəti qolun vurulmasına imkan vermədi.

70-cü dəqiqədə Elvinin ötürməsini Yankoviç birbaşa qapıya göndərsə də, top dirəyə dəyib meydanı tərk etdi. Zaman keçdikcə "Rakuv" daha çox müdafiə olunur, hər fürsətdə vaxt aparırdı. Qurban Qurbanov taktiki gediş edərək Elvini Diakabi ilə əvəzlədi. Komanda faktiki 3 müdafiəçi, 5 hücumameyilli futbolçu ilə oynayırdı. Lakin bu da işə yaramadı. Ağdamlılar 7 uzatma dəqiqəsi ilə birgə 12-13 dəqiqə ərzində "Rakuv"u qapısına sıxsa da, qol vura bilmədi. Qonaqlar tez-tez ora-burasını tutub yerə yıxılır, vaxt öldürürdü. Ancaq “Qarabağ” günahı ilk növbədə özündə axtarmalıdı. Necə deyərlər, özü yıxılan ağlamaz! Ağdamlılar artıq mübarizəni Avropa Liqasının 3-cü təsnifat mərhələsində davam etdirəcək. HİK-lə ilk oyun avqustun 10-da Bakıda, cavab görüşü isə 17-də Finlandiyada keçiriləcək.

Gözdən qaçmadı

* "Linkoln Red İmps"lə görüşdən fərqli bu qarşılaşmada BOS-da meydanın kənarlarında elektron reklam lövhəsindın istifadə olunurdu.
* Həmin lövhədə "United Sport" və "TVnet.az" şirkətlərinin reklamının olması diqqətimizdən yayınmadı.
* Havanın isti və rütubətli olması oyuna təsir edirdi. Bu səbəbdən də almaniyalı referi Sven Yablonski hər hissədə bir dəfə su fasiləsi verdi.
* Tribunlarda azsaylı "Rakuv" azarkeşləri nəzərə çarpsa da, "Qarabağ" fanatları onların səslərinin çıxmasına imkan vermirdi.
* 88-ci dəqiqədə "Qarabağ" künc zərbəsindən topu oyuna daxil etdikdən sonra hakim Medinanın Arseniçə qarşı qaydanı pozduğunu bildirərək cərimə zərbəsi təyin etdi. Başda Qurban Qurbanov olmaqla "Qarabağ"ın ehtiyat oyunçular skamyası 4-cü hakimə etiraz etdi.
* 88-ci dəqiqədə yaşananlardan sonra Qurban Qurbanov sarı vərəqə ilə cəzalandı. Lakin həmin vərəqə nə UEFA-nın saytında, nə də digər platformalarda göstərilib.
* Qarşılaşma bitəndən sonra Şahruddin Məhəmmədəliyevin rəqib qolkiperlə forma dəyişməsi maraqlı məqamlardan idi.
* "Qarabağ"ın əsas azarkeş qruplarından olan "İmarət" komanda məğlub olsa da, böyük coşqu ilə alqışlayaraq dəstək oldu.
* "Qarabağ" məğlub olsa da, jurnalistlər mətbuat konfransında xoş süprizlə qarşılaşdılar. Qonaq komandanın mətbuat xidməti media mənsublarına "Qarabağ" - "Rakuv" matçının şərfini və braşürünü bağışladı.