“Bildiyim qədər “Molde” daha çox müdafiəyə üstünlük verən, qapalı oyun sərgiləyən komanda deyil. Rəqib hücum cəhdləriylə açıq futbol oynayır. Ümumiyyətlə, Skandinaviya ölkələrində bu tərzə tez-tez rast gəlinir. Məncə, rəqibin oyun üslubu “Qarabağ”a sərf edəcək. Çünki “köhlən atlar” belə komandalara qarşı maraqlı və baxımlı oyun göstərməyi bacarır. Kimin autsayder, kimin favorit olması haqda danışmaq çətindi. Bu gün heç bir nəticə məni təəccübləndirməyəcək. Düşünürəm ki, hər iki tərəf bərabərsəviyyəlidi. Matç təmsilçimizin böyükhesablı məğlubiyyətiylə də bitə bilər, qələbəsiylə də. Ümid edirəm ki, ikinci ehtimal reallaşacaq. “Qarabağ”a uğurlar”.

“Molde” tanınmış komandadı. Çempionlar Liqasının pley-off mərhələsində “Qalatasaray”la qarşılaşdı. Həmin matçları izlədim. Məğlubiyyətlərə baxmayaraq, Türkiyə təmsilçisinə xüsusilə ikinci hissələrdə göz açmağa imkan vermədi. Hətta deyərdim ki, onlar skandinavlar kimi deyil, qafqazlılar kimi mübarizə aparır. Hər halda, oyunları izləyərkən belə qənaətə gəldim. Matçın axarını idarə etməyi sevirlər. “Molde” istədiyi vaxt təzyiqi azalda və ya artıra bilir. “Qarabağ”ı çox çətin oyun gözləyir. Əminliklə demək olar ki, asan olmayacaq. Məncə, evdə heç-heçə edib səfərdən qələbəylə dönmək daha sərfəli nəticə olar. Çünki “Qarabağ” son vaxtlar səfərdə daha yaxşı oynayır. Açığı, bugünkü oyunda qələbə ehtimalı azdı. “Molde” “Həkken”dən daha güclüdü. Bu üzdən norveçlilərdən xal qazanmasaq belə, “Həkken”dən 6 xal qoparıb qrupda ikinci yerə yiyələnmək olar. Onu da deyim ki, “Molde” müdafiədə oturmur. “Qarabağ”a sərf edəcək hallardan biri də budu. Onlar rəqibə öz oyununu göstərmək üçün şans verir, daha dəqiq desək, açıq futbol təklif etməkdən çəkinmir. Yenə deyirəm, heç-heçə bizim üçün ən yaxşı nəticə olar. Buna baxmayaraq, inşallah, uğurlu başlayarıq və ilk qələbəmizi qazanarıq”.