“Qarabağ”ın azərbaycanlı futbolçuya ehtiyacı olmadı
Misli premyer-liqasının 2023/24 mövsümünün yay “transfer pəncərəsi” dövründə keçidi reallaşan ən yaxşı 20 əcnəbinin siyahısını nəzərinizə çatdırmışdıq.
Həmin yazını hazırlayarkən seçim etməklə bağlı problem yaşamışdıq. Çünki əcnəbilərin sayı yetərincə çox idi. Bu səbəbdən də mövqelər üzrə hər komandadan bir futbolçu seçməyə çalışdıq. Bu dəfə isə yayda reallaşan ən yaxşı yerli futbolçu transferlərinin siyahısını diqqətinizə çatdıracağıq.
Bu il komandalarımız az sayda yerli oyunçunun keçidini rəsmiləşdirib. Bu isə iki məqamdam xəbər verir: ya yerli futbolçu qıtlığı yaşayırıq, ya da premyer-liqa təmsilçiləri daha iddialı heyət formalaşdırmaq üçün əcnəbilərə üz tutub. Cari “futbol ili”ndə özümüzkülərə ən çox güvənən “Kəpəz”di. Gəncə təmsilçisi heyətini 7 oyunçu ilə gücləndirib. Təbii ki, bu da anlaşılandı. Sponsoru olmayan klub pula qənaət etmək üçün belə yola əl atıb. Bu göstəricidə sonuncu pillədə “Qarabağ” qərarlaşıb. “Köhlən atlar”ın azərbaycanlılara ehtiyacı olmayıb.

1. Kəpəz: Vurğun Hüseynov (Sumqayıt), Rüfət Əhmədov (Qəbələ), Əli Səmədov (Şamaxı), Ehtiram Şahverdiyev (Turan Tovuz), Elmir Tağıyev (Səbail), Vüsal Məsimov (Turan Tovuz), Şakir Seyidov (Sabah) – 7.
2-3. Səbail: Yusif Nəbiyev (Kəpəz), Süleyman Əhmədov (Sumqayıt), Rüfət Abdullazadə (Sumqayıt), Səlahət Ağayev (Qəbələ), Coşqun Diniyev (Zirə), Bahadur Həziyev (Şamaxı), Amil Yunanov (Şamaxı) – 6.
2-3. Araz-Naxçıvan: Turan Manafov (Səbail), Nihat Qurbanlı (Səbail), Nicat Süleymanov (Kəpəz), Elçin Mustafayev (Şamaxı), Abdulla Rzayev (Sabah), Zamiq Əliyev (Kəpəz) - 6.
4-5. Turan Tovuz: Fərid Nəbiyev (Kəpəz), Aydın Bayramov (Sumqayıt), Sərtan Taşkın (Zirə), Budaq Nəsirov – 4.
4-5. Sumqayıt: Mehdi Cənnətov (Zirə), Orxan Sadıqlı (Kəpəz), Rövlan Muradov (Qəbələ), Kamran Quliyev (Şamaxı) – 4.
6-7. Zirə: Məqsəd İsayev (Qəbələ), İsmayıl İbrahimli (Qarabağ), Fuad Bayramov (Şamaxı) – 3.
6-7. Neftçi: Emil Balayev (Səbail), Filip Ozobiç (Qarabağ), Qara Qarayev (Qarabağ) – 3.
8. Qəbələ: Rauf Hüseynli (Şamaxı), Rəşad Əzizli (Şamaxı) – 2.
9. Sabah: Rəhman Daşdəmirov (Şamaxı) – 1.
10. Qarabağ: 0.

Komandalarımız bu yay 36 yerli oyunçu transfer edib. Onlardan ən yaxşı saydığımız “10-luq” belədi:

1. Aydın Bayramov (Turan Tovuz): ötən mövsüm “Sumqayıt”dakı çıxışı alınmayan qolkiper ona doğma olan Ayxan Abbasovun yanına yollandı. Qapıçı cari “futbol ili”nə yaxşı başlayıb. 5 qarşılaşmanın üçündə qapısını toxunulmaz saxlayan Aydın bu mövsüm “boz qurd”un ən yaxşı transferlərindən sayılır.
2. Yusif Nəbiyev (Səbail): 2022/23 mövsümündə “Kəpəz”in kapitanı olan müdafiəçinin daha iddialı kluba keçəcəyi əvvəlcədən bəlli idi. 26 yaşlı futbolçu daha çox oynaya biləcəyi komanda axtarışında idi. Şahin Diniyevin də onu istəməsi Yusifin “Səbail”ə keçidinin əsas səbəblərindən oldu. “Dənizçilər”in heyətindəki performansı onun milli komandaya yolunu açdı.
3. Abdulla Rzayev (Araz-Naxçıvan): 2022/23 mövsümündə qış fasiləsindən sonra “Kəpəz”in əsas üzvlərindən olan müdafiəçinin “Sabah”a geri dönəcəyi gözlənilirdi. Lakin 21 yaşlı futbolçu “bayquşlar”a lazım olmadı. Bu səbəbdən də Murad Musayev Abdullanı yenidən icarəyə göndərdi. Azər Bağırovun əsas heyətdə daim oynatdığı müdafiəçi çıxışı ilə göz oxşayır.
4. Məqsəd İsayev (Zirə): “Qəbələ”nin heyətində ölkə kubokunu qazanan müdafiəçinin “Zirə”yə keçidi gözlənilməz oldu. Avrokuboklarda çıxış edən klubu tərk etmək də böyük cəsarət tələb edirdi. Lakin “qartallar”ın münasib təklifi və Rəşad Sadıqov amili transferin həyata keçməsinə səbəb oldu. Məqsədin Bakı təmsilçisindəki performansını yüksək qiymətləndirmək olar.
5. Fuad Bayramov (Zirə): 2022/23 mövsümünün kəşfi sol cinah müdafiəçisi idi. “Şamaxı”nın döyünən ürəyi sayılan Fuadın daha iddialı kluba keçəcəyi gözlənilirdi. Futbolçunu istəyən klublar arasında “Qəbələ”, “Sabah”, “Zirə” var idi. Yekunda Fuad Rəşad Sadıqovun komandasının üzvü olmaq qərarını verdi.
6. Qara Qarayev (Neftçi): “Transfer pəncərəsi”nin ən səs-küylü keçidi oldu desək, yanılmarıq. “Qarabağ”dan əsas heyətə düşmədiyinə görə ayrılan Qara “Neftçi”də premyer-liqa matçlarının hamısında meydanda olub. 31 yaşlı futbolçunun flaqmana xeyir verib-verməyəcəyini zaman göstərəcək. Lakin Adrian Mutunun millimizin üzvünə güvənməsi çox şeydən xəbər verir.
7. Rövlan Muradov (Sumqayıt): yayın ən uğurlu transferi adlandıra bilərik. Rövlan “Sumqayıt”ın heyətində 5 oyun ərzində möhtəşəm performans sərgiləyir. Bu görüşlərdə 2 qol vuran, 3 məhsuldar ötürmə verən yarımmüdafiəçi, təəssüf ki, De Byazinin diqqətindən kənarda qaldı.
8. Fərid Nəbiyev (Turan Tovuz): 2022/23-də “Kəpəz”in əsas simalarından olan yarımmüdafiəçinin “boz qurd”a keçidi gözləniıməz oldu. Lakin Ayxan Abbasov amili bu transferdə əsas rol oynayıb. Fəridin başqa variantları da var idi. Lakin o, Qərb bölgəsindən ayrılmayaraq “Turan Tovuz”u seçdi. Əsas heyətdə müntəzəm oynamaq istəyi də onyn belə qərar verməsinə səbəb oldu.
9. Filip Ozobiç (Neftçi): yığma üzvünün Azərbaycandakı karyerası olduqca maraqlıdı. “Qəbələ”də özünü sübut edən Ozobiç daha sonra “Qarabağ”ın əsas simalarından oldu. Onun “Neftçi”yə keçidi maddi səbəblərdən oldu. Flaqmanın səviyyəli yerli oyunçuya ehtiyacı var idi. Bu səbəbdən də yarımmüdafiəçinin istədiyi məbləğlə razılaşan Bakı təmsilçisi yayın ən yaxşı transferlərindən birini həyata keçirdi.
10. Kamran Quliyev (Sumqayıt): premyer-liqada həm yerli, həm də əcnəbi hücumçu qıtlığı yaşanır. Heç olmasa, 3-4 əcnəbi forvard adı çəkmək olur, özümüzkülərdə isə bu problemdi. Buna baxmayaraq, Kamran Quliyevin “Sumqayıt”a keçidini ən yaxşılardan hesab etmək olar. Ötən mövsüm özünü “Şamaxı”da yaxşı tərəfdən göstərən Kamranın “kimyaçılar”da da işləri qaydasındadı. Gənc forvardın da bu mövsümün ən yaxşılarından olacağını söyləyə bilərik.

İLKİN SULTANLI