"Belə “futbolçular"ı azərbaycanlı kimi sırımaqla ölkə futbolunu və yığmamızı zəlil günə qoyublar" -ÖZƏL AÇIQLAMA
Qəbələ şəhər stadionunda keçirilən ölkə kubokunun finalında “Qarabağ” “Zirə”yə qalib gəlməklə "qızıl dubl" etdi.
Bununla da Azərbaycanda futbol mövsümü başa çatdı. Qarşıdan komandaların avrokuboklara, növbəti mövsümə hazırlıq çəçivəsində təlim-məşq toplanışları gəlir. Həmin prosesin tərkib hissələrindən biri də transfer çalışmalarıdı. Görəsən, ölkədaxili "transfer bazarı" klublarımızın ehtiyacını qarşılamaq gücündədi?
"Football-plus.az" saytı olaraq bununla bağlı Səbuhi Səfiyarlının fikirlərini öyrəndik. “Legionerlərlə bağlı ciddi problem olacağını düşünmürəm. İstənilən səviyyəyə, büdcəyə, tapşırığa uyğun xarici ölkələrdən oyunçu cəlb etmək mümkündü. Əsas problem keyfiyyətli yerli futbolçuların qıtlığıdı. Hər komandanın meydanda 5, ehtiyatda isə 7-8 yerli futbolçuya ehtiyacının olduğunu nəzərə alsaq, 12-13 azərbaycanlı oyunçu olmalıdı. İndi həmin 12-13 yerli futbolçunu 10 komandanın sayına vursaq, 120-130 edir. Çempionatımızda da qeyd olunan sayda faydalı iş əmsalı yüksək olan yerli futbolçu yoxdu. Həmişə demişəm, yerli futbolçular uşaq futbol məktəblərində yetişib, aşağı liqalarda diqqət mərkəzinə düşür. Azərbaycanın futbol coğrafiyasında aşağı liqalar yoxdu. 1-ci divizionun vəziyyəti də acınacaqlıdı. Halbuki həmin çempionatda çıxış edən komandaların sayını artırmaq, səviyyəli futbolçuları ora cəlb etməklə güclü çempionat yaratmaq olardı. Divizionun səviyyəsi ilə ayaqlaşmayan futbolçular üçün 2-ci divizion yaradılmalıdı. Aşağı liqalar yaratmasaq, futbolçu qıtlığı daha da çoxalacaq. Bu istiqamətdə işlər görmək lazımdı.
Mən, ümummiyətlə, bizə yaxından-uzaqdan əlaqəsi olmayan futbolçulara pasportumuzu paylamaqla "milliləşdirmənin" əleyhinəyəm. Azərbaycanda uşaq futboluna, akademiyalara bu qədər pullar ona görə xərclənib ki, əcnəbiləri “milliləşdirməklə" çempionatımıza doluşduraq?! Əli Qurbani, Höccət Haqverdi, Dmitri Nazarov və başqalarının Azərbaycana bağlılığı yoxdu. Belə “futbolçular"ı azərbaycanlı kimi sırımaqla ölkə futbolunu və yığmamızı zəlil günə qoyublar".
Səbuhi bəy çempionatda 21 yaş limitinin götürülməsinə də aydınlıq gətirdi:"Mən limitə düşən gənc futbolçularla çox işləmişəm. Onların mütləq əksəriyyəti sırf limitə görə öz üzərində işləmir. Çünki arxayındılar ki, onsuz da oynayacağıq. Gənc futbolçulara şans verilməsinin tərəfdarıyam, amma limit hesabına yox. Premyer-liqa klublarımızda oynamaq istəyən gənclər bunu haqq etməlidi. Ona görə də limitin qaldırılmasını dəstəkləyirəm".
ABDULLA İSMAYILOĞLU
Digər xəbərlər
