Premyer-liqada 4-cü turun korrekt mübarizə şəraitində keçdiyini demək olarmı?

Bir tərəfdən, bəli. Ona görə ki, baş məşqçilər oyundan sonra hakim qərarlarını müzakirə çıxarmadı və 5 oyunda cəmi 13 sarı vərəqə qeydə alındı. Digər tərəfdən, xeyr də deyə bilərik. 5 oyunun ikisində qırmızı vərəqə göstərildi. Üstəlik məşqçilərin cəzalandırılması da adi hal alıb. Hesabat turunda Rasim Ramaldanovla Artur Olenin hakimin sərt üzünü gördü. Reportyorlarımızın qeydlərinə keçid alaq.

Zirə - Sabah, ELÇİN MƏSİYEV
Oyunun gərgin keçəcəyi və hakimlərin də çox yüklənəcəyi öncədən gözlənilirdi. “Zirə” erkən qol vurandan sonra meydanda mübarizə daha da gərginləşdi. Odu ki, referi sərt epizodlara və qayda pozuntularına görə tez-tez fitini səsləndirirdi. Elçin Məsiyevin diqqətindən qaçan və obyektiv olmadığı epizodlar da oldu. 18-ci dəqiqədə Qismət Alıyev Aleksey İsayevə qarşı kobud oynasa da, fit susdu. 27-ci dəqiqədə "Sabah" futbolçuları əks-hücuma çıxarkən meydanın onlara aid hissəsində Məqsəd İsayev bir neçə dəfə Con İrasabala qarşı kobudluq etsə də, həm baş hakimin, həm laysmanların, həm də 4-cü hakimin diqqətindən yayındı. Həmin epizodun gözdən qaçdığını görən Murad Musayev tribunadan 4-cü hakimə etirazını bildirdi. 35-ci dəqiqədə Aleksey İsayev Eldar Quliyevə kobudluq etsə də, hakimin fiti susdu. Analoji hadisə İrasabaldan Məqsəd İsayevə qarşı baş verdikdə referi yenə tolerant oldu. 68-ci dəqiqədə Kulaç sürətli əks-hücuma çıxarkən Amin Seydiyev onun ayağına çox sərt zərbə endirdi. Bu üzdən futbolçu arasında qarşıdurma yarandı, ara qarışdı. Elçin Məsiyev hər iki oyunçuya sarı göstərsə də, meydan sahiblərinin və azarkeşlərin etirazı səngimədi. Ardınca VAR otağından müdaxilə gəldi. Referi epizodu daha detallı incələmək üçün monitora yaxınlaşdı. Daha sonra sarı vərəqə dəyişərək Aminə birbaşa “qırmızı” göstərməklə onu vaxtından əvvəl paltardəyişmə otağına yolladı. Bu vaxt bütün zirəli azarkeşlər hakimi alqışladı.

Neftçi – Qəbələ, RƏŞAD ƏHMƏDOV
İlk yarıda meydanda çox sönük oyun getdi. Qonaqlar “vaxt öldürmək” üçün hər imkandan yararlanırdı. Bu da həm oyunda tempi aşağı salırdı, həm də hakimi işini görmürdük. Rəşad Əhmədov 67-ci dəqiqədə diqqət mərkəzinə düşdü. Belə ki, "Neftçi"nin gənc qolkiperi Rza Cəfərov cərimə meydançasından kənarda əllə oynadı. Epizod referinin gözündən yayınsa da, VAR-dan müdaxilə gəldi. Təxminə 3 dəqiqə epizodla bağlı VAR otağında müzakirə getdi. Sonra Mingəçevirdən olan referi özü monitora yaxınlaşıb epizodu dəyərləndirdikdən sonra "ağ-qaralar"ın qapıçısına birbaşa qırmızı vərəqə göstərməklə meydandan qovdu. Ümumi götürəndə referi işinin öhdəsindən gəldi. O, cəmi 2 dəfə əlini cibinə saldı və hər iki epizodda da haqlı idi.

Araz-Naxçıvan – Sumqayıt, KAMAL UMUDLU
Turun açılış matçı "Dalğa Arena"da keçirildi. "Araz-Naxçıvan"la "Sumqayıt"ın qarşılaşmasında nominal meydan sahibləri daha yaxşı mübarizə aparsa da, 1:1 hesabı qeydə alındı. Hakimlik də yüksək səviyyədə oldu. Kamal Umudlu və briqadası oyunu yaxşı idarə etdi. Düzdü, xırda səhvlər olsa da, görüş qaydalar çərçivəsində idarə olundu. Penalti qərarı da doğru idi. Baş məşqçilərin qarşılaşmadan sonra hakimlik barədə nəsə söyləməməsi dedimlərimizin əyani isbatıdı. Qısası, Kamal Umudlu bu oyunu ideala yaxın idarə etdi.

Qarabağ - Kəpəz, ƏLİ ƏLİYEV
Sakit tempdə keçən oyunda referinin üzərinə böyük yük düşmədi. Yalnız iki dəfə diqqət mərkəzində olan hakim ilk “sarı”nı 66-cı dəqiqədə Riçard Almeydaya qarşı kobudluq edən Rüfət Əhmədova göstərdi. Əli Əliyev 2 dəqiqə sonra yenidən qayda pozuntusu ilə yadda qalan Rüfəti bu dəfə bağışlamağa məcbur oldu. 71-ci dəqiqədə Elnur Cəfərov “Qarabağ”ın hücumu zamanı Elvin Cəfərquliyevin onun formasından tutub dartmasıyla bağlı hakimə etiraz elədi. 82-ci dəqiqədə Juninyo Xvalkoya qarşı kobudluq etsə də, hakim bunu vərəqə ilə qiymətləndirmədi. 90+3 dəqiqədə Onanuqa açıq ayaqla cərimə meydançasının daxilində Elvin Cəfərquliyə zərbə vurdu. Bunu oyun epizodu kimi dəyərləndirən referi hücum üstünlüyünü “Qarabağ”a verməklə kifayətləndi.

Turan Tovuz – Səbail, TURAL QURBANOV
Tovuzdakı matçın gərgin keçəcəyi bəlli idi. Amma komandalar gərginliyin axınına qapılıb ciddi qayda pozuntusuna yol vermədi. Bu da Tural Qurbanovun işini xeyli asanlaşdırdı. Həm “Səbail”, həm də ədalət təmsilçisi azarkeşlərin kəskin təzyiqi altında ortaya yaxşı iş qoydu. Əlbəttə, tovuzlu tərəfdarların, demək olar ki, hər epizoda görə narazı qalması emosionallıqdan irəli gəlirdi. Lakin bu məqam hakimin fəaliyyətinə kölgə salmamalıdı. Qurbanov matç ərzində bir sarı vərəqə göstərdi. Həqiqətən də topun əlinə dəyməsinə baxmayaraq, oyuna davam edən Qomis bunu haqq etmişdi. Diqqətçəkən yeganə məqam isə ilk yarıya cəmi 1 dəqiqənin artırılması idi. Halbuki hakim oyunda dayanmaların daha uzun çəkdiyini nəzərə almalıydı. Hələ su fasiləsini nəzərə almırıq.