Millimiz AÇ-2024-ün seçmə mərhələsinin 5-ci turu çərçivəsində doğma meydanda Belçika seçməsini qəbul edəcək.

"Football-plus.az" xəbər verir ki, matçdan öncə keçirilən mətbuat konfransında yığmamızın baş məşqçisi Canni De Byazi jurnalistlərin suallarını cavablandırıb:

- Belçikadan xal alacağınıza özünüz inanırsınız?
- Bizdə belə misal var, ümid sonda ölür. Mentalitetim belədi ki, oyundan öncə uduzmuram, mübarizəni sevirəm. Futbolçu kimi də belə olmuşam. Başa düşürük ki, güclü komandaya qarşı oynayacağıq. Onlar da bizim kimi insanlardı, futbolçulardı. Sabah ən yaxşısını etməyə çalışacağıq. Rahat, asan oynamalıyıq ki, futbolçular azarkeşləri və özlərini sevindirsinlər.

- Höccət Haqverdinin yığmaya dəvət edilməsi söz-söhbətə səbəb oldu. Klubunda oynamır, amma milliyə dəvət alır. Bu haqda fikriniz necədi?
- Höccət həmişə millinin üzvü olub. Bu mövsüm cəmi 6 dəqiqə oynayıb. Ola bilər ki, sabah ilk dəqiqədən oynamasın. Amma lazım olsa, 20-30- dəqiqə oynaya bilər. Höccət vacib oyunçudu, bizə kömək edə bilər.

- Dediz ki, oyundan qabaq uduzmuram, mübarizəni sevirəm. Üç il əvvəl Lüksemburqla görüşdən əvvəl demişdiz ki, məqsədim futbolçuların mentalitetini dəyişməkdi. Üç il keçib, oyunçuların mentalitetini dəyişə bilmisiz?
- Bizim hər bir oyunçumuz tam şəkildə motivasiyalıdı. Sabah ən yaxşısını edəcəklər. Bəli, demişdim ki, günü-gündən inkişaf etməliyik, mübarizə aparmağa hazır olmalıyıq. Bu tək futbolçu üçün yox, başqa sənət sahibləri üçün də belədi. Düzgün məsləhətlər almalıyıq, təcrübələrdən nəticə çıxarmalıyıq.

- İtaliya mətbuatına açıqlamanızda bildirmisiz ki, tərcüməçiniz Romelu Lukakunun gəlişinə sevinir. Bəs, sizcə Belçika millisinin heyətində ən təhlükəli oyunçu kimdi?
- Belçika yığması tək Lukakudan ibarət deyil, çox yaxşı oyunçuları var, güclü klublarda oynayırlar. Təbii ki, zarafat idi, təcrüməçim "Roma"ya azarkeşlik edir, amma bu, sabaha aid deyil.