“Yaxın dostlar məni “Zəngəzur”da oynamağa dəvət etdilər. Bildiyiniz kimi, hazırda “Araz- Naxçıvan”dayam və minifutbol oynamağım çətin olardı. Lakin Naxçıvan təmsilçisinin rəhbərliyi “harda Azərbaycan adı varsa, bizim üçün problem deyil”, - deyə mənə “Zəngəzur”un heyətində avrokuboklara yollanmağa icazə verdilər. Buna görə də Zaur Axundova və klubda işləyən digər şəxslərə təşəkkür edirəm. Klub yaratmaq məsləsinə gəlincə, mənə çoxdan yeni komanda qurmaqla bağlı təklif irəli sürmüşdülər. Dedilər ki, həftədə bir dəfə məşq olmaq şərti ilə gəlin bizi çempionatda təmsil edin. Mən də yığma komandanın keçmiş üzvlərinə belə planımızın olduğunu dedim. Sağ olsunlar, sözümü yerə salmadılar, yeni yaradılacaq komandada çıxış etməyə razı olacaqlarını dedilər. Hazırda bir neçə məsələ qalıb. Onlar da həll olunsa, yeni mövsümdə çempionata rəng qatan kollektiv quracağıq. İndi bizim uşaqlar da başqa işləri olduqları üçün öz şərtlərini də mənə deyiblər. Mən də bunu rəhbərliyə çatdıracam. Belə vəziyyət keçmiş komanda yoldaşlarımızla daha çox vaxt keçirməyə də kömək edəcək. Avrokuboklardan sonra bu barədə geniş danışacağıq”.

“Hələ ki maliyyə şərtlərində konkret razılıq əldə olunmayıb. Komandanın baş məşqçisi və adı da dəqiq deyil. Təklif göndərdiyim oyunçular Rauf Əliyev, Rahid Əmirquliyev, Cavid Hüseynov, Rail Məlikov, Elvin Məmmədov, Mahir Şükürov, İlqar Qurbanov, Ruslan Abışov və Vaqif Cavadovdu. Kamran Ağayevi də gətirmək istəyirdim. Lakin hələ o tam hazır deyil. Dedim ki, istirahət elə, növbəti aylarda səni də komandaya çağıracağıq”.