"Bizə xoşdu ki, Şahruddin həm "Qarabağ"ın, həm də millinin qolkiperi olaraq, Türkiyə superliqasında çıxış edəcək. Həm klubumuz, həm də ölkənin əsas komandası üçün bir piardı. Düşünürəm ki, bunun futbolumuza faydası olacaq. Şahruddin üçün də düşərli olacağına inanıram və ona uğurlar arzulayıram. O, həmişə yaxşı qapıçı kimi yaddaşımızda qalacaq".

"Şahruddin Məhəmmədliyev "Qarabağ" üçün meydanda can qoyan oyunçulardan biri olub. Onu bəyənməyən, yersiz tənqid edənlər "Qarabağ"ın gerçək azarkeşləri deyil. Çünki onlar gündüzlü-gecəli, qarlı-yağışlı havada bizlərlə birgə komandamıza dəstək olmayıblar. "Qarabağ"ın uğurlarına şərik olan hər bir azarkeş bilir ki, klubun 10 il ardıcıl qruplara düşməsində Şahın xüsusi xidmətləri var. Təbii, istəməzdik ki, qapıçı bizdən ayrılsın, amma neyləmək olar, futbolçu bu gün burdadı, sabah başqa yerdə. Şahruddiyə gələcək karyerasında bolluca uğur arzulayıram. İnanıram ki, o Türkiyədə özünü ən yaxşı tərəfdən göstərəcək".

Şahruddin həmişə sevdiyim, dəstəklədiyim futbolçulardan biri olub. Oyunundan əlavə onun xarakterini də həmişə çox bəyənmişəm. O, "Sumqayıt"dan bizə gələndə əksər azarkeşlər kimi mən də təəccüblənmişdim. Görəsən, Qurban hoca bu çəlimsiz, balaca oğlanda nə görüb ki, onu "Qarabağ"a gətirib? Adam illərlə ehtiyatda qaldı, bəzən 2-ci, 3-cü qapıçı oldu. Ancaq üzərində daim işlədi, heç ruhdan düşmədi, sonda əsas qapıçımız oldu. Zaman-zaman istər millidə, istər "köhlən atlar"da bizi qürurlandırdı, böyük qurtarışlar elədi. Səhvləri də oldu, əsəbləşdik, deyindik, qınadıq, ehtiyatda qalmasını da istədik. Ancaq getməsini istəməzdim. Sadəcə, indiki durumda "Qarabağ"da qalıb toparlanması bəlkə də çətin olardı. Son oyunda gördüm ki, psixoloji durumu da qaydasında deyil. Rəsmən çökmüş görünürdü. Ona görə də özü üçün xeyirlisi olacaqsa, qoy getsin. Etdiyi səhvlərə rəğmən, mənim üçün o hələ də Şahdı və sözün açığı, onun üçün darıxacam".