“Şahruddin səhv edəndə hamı ondan danışır, yaxşı oynayanda isə…”
"Qarabağ" sabah Çempionlar Liqasının 2-ci təsnifat mərhələsinin cavab görüşündə Polşa "Rakuv"unu qəbul edəcək.
Bu matçla bağlı "köhlən atlar"ın sabiq braziliyalı qapıçısı, hazırda Portuqaliya "Torreense"sində çıxış edən Vaqner da Silva ilə əlaqə saxladıq.
37 yaşlı qolkiper "Football-plus.az"a açıqlamasında bunları dedi:
"İnanıram ki, "Qarabağ" sabah qalib gələcək. Komandanın mərhələ adlamaq şansı böyükdü. Biz həmişə "Qarabağ"ın geridönüşlər etdiyinin şahidi olmuşuq. Çalışacam ki, sabiq komandamın oyununu izləyim. Qurban müəllimə və kollektivinə uğurlar arzulayıram".
Təcrübəli qapıçı həmkarı Şahruddin Məhəmmədəliyevin avrokubok matçlarındakı səhvləri ilə bağlı bunları söylədi:
"Mən artıq bir neçə dəfə demişəm ki, Şahruddin Azərbaycanın ən yaxşı qapıçısıdı. Səhv edəndə hamı ondan danışır, yaxşı oynayanda isə heç kimin yadına düşmür. Biz qapıçılar hamımız belə səhvlər edirik. Hətta dünya futbolunda Noyer, Buffon, Kasilyasın da uğursuz çıxışlarını görmüşük. Şahruddin psixoloji cəhətdən çox güclüdü və sabah əla oyun keçirəcək".
CAVİD ƏLİYEV
