Ser Aleks Ferqyuson üçün həmişə ən kiçik detal da önəmli olub.

“Football-plus.az” xəbər verir ki, 2014/15 mövsümündə “Yunayted” Amerikanın avtomobil nəhəngi “Şevrole” ilə əlverişli sponsorluq müqaviləsi bağladı. İstehsalçının loqosu klubun futbolkasında göründü. Buna qədər, iki il əvvəl “qırmızı şeytanlar” brendin ana kompaniyası “General Motors” ilə anlaşmışdı. Əksər belə nümunələrdə olduğu kimi, titul sponsoru “Mançester Yunayted”in bütün oyunçularına seçim üçün lüks sinfindən olan bir neçə avtomobil, o sıradan dövrünün möhtəşəm modeli olan “Corvette” də təklif etmişdi. Onun qiyməti modelindən asılı olaraq, 80-90 min funt arasında dəyişirdi.

Həmin vaxt klub rəhbərliyi ucdantutma bütün futbolçulara lüks avtomobillər paylamaq istəyirdi. Düzdü, maşının modeli futbolçuların klubda keçirdiyi vaxtdan və sürücülük təcrübəsindən asılı olacaqdı. Ancaq Ferqyuson dərhal müdaxilə etdi və komandadakı durumundan asılı olmayaraq, yaşı 23-dən aşağı olan futbolçuların lüks avtomobil sifariş etməsəini əngəllədi. Bu isə o demək idi ki, Denni Uelbek, Fil Cons, Kris Smollinq və Rafael bossun xeyir-duasını vermədiyi maşında gəzə bilməyəcəkdi.
Əfsanəvi məşqçinin bu jesti güzəştsiz idarəçilik üslubuna dair parlaq nümunələrdən biridi. O, həmişə gənc oyunçuların “ulduz xəstəliyinə tutulmaması” üçün çalışırdı. MY-nin əfsanələrindən Ueyn Runi bir dəfə telekanallardan birindəki açıq söhbətdə ser Aleksin gənc oyunçuları təvazökar maşınlarda gəzməyə məcbur etməsi barədə danışmışdı: “Aleks Ferqyuson komandada işləyəndə yaşı 25-dən aşağı olanların idman maşını sürməsinə icazə vermirdi. Məhz belə xırda detallar intizamı qorumağa imkan verir. Əlbəttə, bu məsələdə daha yaşlı oyunçuların yardımı da lazımdı”.

2020/21 mövsümü bitəndən sonra “Şevrole” ilə əməkdaşlıq sona çatdı və “TeamViewer” şirkəti klubun yeni sponsoru oldu. İndi MY-nin rəhbərliyində Aleks Ferqyuson olmadığı kimi, komanda da böyük uğurlardan uzaq düşüb.