Ferqyusonun həftəlik qazancı 235 min funtdu.

Aleks Ferqyuson 9 il əvvəl məşqçi karyerasını bitirib. Ancaq “Mançester Yunayted” bu günə qədər əfsanəvi şotlandiyalını layiqincə əvəzləyə biləsi mütəxəssis tapmayıb. Ser Aleksin qayıdışını da gözləməyə dəyməz – o, sakit təqaüdçü həyatından həzz alır. Və hətta çoxlu pul qazanır. Bugünlərdə məşhur “The Sun” tabloidi Ferqyusonun həftədə 235 min funt qazandığını xəbər verib. Başqalarının pulunu saymaq yaxşı vərdiş olmasa da, “The Sun” belə məsələlərdə ustadı. Bu nəşr şotlandiyalının illik gəlirini hesablayıb, sonra da məbləği həftə sayına bölüb. Bəs axı Ferqyuson bu qədər pulu hardan qazanır?

İldə 20 gün səfir olur, kitabları satılır, ruhlandırıcı çıxışlar edir

• Gəlirin önəmli hissəsi “Mançester Yunayted”i səfir kimi təmsil etməyin payına düşür. Ser Aleks bu missiyaya görə ildə 2 milyon funt qazanır. İldə bu missiyaya uzaqbaşı 20 gün sərf etdiyini nəzərə alsaq, əla məbləğdi. Əslində bunu fəxri pensiya da saymaq olar.

• Kitab satışından da pul gəlməkdədi. Ser Aleksin yazdığı “Mənim avtobioqrafiyam” kitabı 2013-cü ildə nəşr olunub. Təbii ki, kitab bestsellerə çevrildi, artıq milyonlarla nüsxəsi satılıb. Ferqyuson hələ də ictimaiyyət önündə çıxışlar edir. Və belə çıxışlar heç də az para gətirmir. Məsələn, şotlandiyalının motivasiyaverici nitqlərinin hər birinə görə 100 min funt qonorar verilir.

• Britaniya qeydiyyat palatasında Ferqyusonun adına olan bir neçə şirkət qeydiyyatdan keçib. Onlardan ən böyüyü “ACF Sports Promotions” adlanırır. Bu ad Alexander Chapman Ferguson ad-soyadının abbreviaturasıdı. Şirkət Ferqyusonun adı ilə bağlı kommersiya ödənişləri ilə məşğuldu, amma başqa fəaliyyət istiqamətləri də var. Son maliyyə hesabatı şirkətin aktivlərinin 2021-ci ildə 17,5 milyon funtdan 26 milyona çatdığını göstərir.

• Ser Aleksin adına qeydiyyatdan keçən üç kiçik şirkət də var. Bunlar isə “Damaja 1983”, “Damaja 1991” və “Daomaja 1999” adlanır. Yəqin ki bu rəqəmlər diqqətinizi çəkdi. Bəli, adlardakı rəqəmlər Ferqyusonun avrokubokları qazandığı illərə işarədi. Söhbət “Aberdin” və MY ilə qazanılan Kuboklar Kubokundan, eləcə də “Yunayted”in qazandığı Çempionlar Kubokundan gedir. Sirli “Domaja” sözü isə onun oğlanlarının – Darren, Mark və Ceysonun adlarının qısaltmasıdı. Bu üç şirkətin aktivləri də ötən il 3,7 milyon funt artıb – hazırda aktivlərin ümumi dəyəri 13,2 milyon funt təşkil edir.
Feryusonun sərvəti təxminən 40 milyon funta yaxındı, il ərzində bunun üzərinə 12,2 milyon da gəlib. Belə görünür ki, “The Sun” məhz bu məbləği ildəki həftə sayına bölərək, yuxarıda göstərdiyimiz həftəlik qazancı müəyyənləşdirib. Heç şübhəsiz, nəinki ləzzətli qocalıq yaşamağa, hətta nəvə-nəticələrə gün ağlamağa da bəs edəcək puldu.