"Qəbələ" Misli premyer-liqasının 5-ci turunda "Zirə"ni qəbul edib - 1:0.

"Football-plus.az" xəbər verir ki, matçdan sonra keçirilən mətbuat konfransında "qırmızı-qaralar"ın baş məşqçisi Elmar Baxşıyev jurnalistlərin suallarını cavablandırıb. Sizi mütəxəssisin fikirləri ilə tanış edirik:

- Rəşad Sadıqova da bu sualı verdik. "Qəbələ" ötən mövsüm də "Zirə"ni məğlub edirdi, bu gün də qalib gəldiniz. Demək olar ki, Rəşad Sadıqov sizinlə bacarmır?
- Mən də Rəşad Sadıqov kimi cavab verəcəm. Meydanda Rəşadla Elmar oynamır, komandalar çıxış edir. Bu gün hər iki komanda qələbə qazana bilərdi. Məsələ odu ki, ilk 4 matçda futbolçulardan istədiyimi ala bilmirdim. Bu dəfə alındı.

- Qırmızı vərəqə aldığınız epizodu necə şərh edərdiniz?
- Emosiyalarla bağlıdı. Hakimlər bizim sözlərimizə dərhal fikir verməməlidi. Biz də oyunun içindəyik. Emosiyalarımı göstərdim.

- Ehtiyatda oyunu gücləndirəcək futbolçu yoxdu. Transfer gözlənilir?
- Heyətimiz say olaraq geniş görünsə də, oyuna təsir edəcək futbolçuların sayı azdı. Güclənməyə ehtiyacımız var. Bu haqda rəhbərliklə danışmışıq. Daha bir futbolçu transfer edəcəyik.

- Xalaylanın oynamamasının səbəbi nədi?
- Narahatlığı yoxdu. Mənim prinsiplərim var. Futbolçular buna uyğunlaşmalıdı. Oynamamasının səbəbini özü bilir. Rejimlə bağlıdı.

- Rəşad Sadıqov bildirdi ki, bu dönəmdə "Qəbələ" ilə qarşılaşmaq istəməzdim. Bəs siz necə düşünürsüz? Ardıcıl məğlubiyyətlərdən sonra liderlə oynamaq çətin deyildi?
- Bizim "Zirə" ilə bütün sınaqlarımız dinamik keçir. Hər iki komanda mübarizə baxımından bir-birinə layiqdi. Azarkeşlər sürətli oyun izlədilər.

- Ardıcıl məğlubiyyətlərdən sonra rəhbərliklə görüşünüz olmuşdu?
- Rəhbərliklə hər gün görüşürəm, məşqlərimizdə iştirak edirlər. Mediada yazılanlar məni təəccübləndirmir. 4 oyun uduzmağımıza baxmayaraq, rəhbərliyin dəstəyini hiss etmişəm. Görsəm ki, bacarmıram, özüm gedəcəm. İstefa haqda düşünməmişəm. Mənə inanıb ora təyin edən adam olub. Mənim rəhbərim var. Mən ona inanıram, o da mənə inanır.

- Transfer edəcəyiniz oyunçunun adı bəllidi?
- Ad olaraq deyə bilmərəm. İki aydı maraqlandığımız futbolçular olub ki, son anda transfer alınmayıb. Ümid edirəm ki, milli fasilə zamanı istədiyim oyunçunu tapacağıq.