"Qəbələ" Misli premyer-liqasının 5-ci turunda "Zirə"ni qəbul edib - 1:0.

"Football-plus.az" xəbər verir ki, matçdan sonra keçirilən mətbuat konfransında "qartallar"ın baş məşqçisi Rəşad Sadıqov jurnalistlərin suallarını cavablandırıb. Sizi mütəxəssisin fikirləriylə tanış edirik:

- Ötən mövsüm də "Qəbələ"yə 4 oyunun 2-də uduzmuşduz. Rəşad Sadıqov Elmar Baxşıyevlə bacarmır, yoxsa "Zirə" "Qəbələ" ilə?
- Ümumiyyətlə, "Qəbələ" mövsümdə oyunlarımız nəticə baxımından uğursuz alınır. Elə matçlar olub ki, açıq-aşkar üstün oynayırdıq. Bu gün seçim imkanım olsaydı, "Qəbələ" ilə qarşılaşmaq istəməzdim. Bilirdik ki, rəqib son döyüşə çıxacaq. İstəkli idik, növbəti qələbəni qazanmaq istəyirdik. Alınmadı, təhlil edəcəyik. 

- İlkin Muradovun əsas komandada olmamasının səbəbi nədi? Onu cəzalandırmısız?
- Cəzalandırmaq deməzdim. İlkin komandamızdadır. Performansı ilə bağlı belə qərar vermişik. Növbəti turlarda meydanda da görə bilərik, komandadan gedişini də görə bilərik.

- Onun problemi nədi?
- Elə məsələlər var ki, media qarşısında danışa bilmərik. Bəzi problemlər var. Çözməyə çalışırıq.

- Qismət Alıyevə meydanda hansı tapşırıq vermişdiz?
- Bilirdik ki, keçmişdə bu mövqedə oynayıb. İsmayılın itkisindən sonra yerli oyunçu ilə bağlı problem yaşayırıq. Buna görə belə qərar verdik. Yaxşı oynayırdı.

- Milli komandaya "Zirə"dən kimlərin çağırılacağını gözləyirsiz?
- Yəqin ki, bizdən çağırılanlar əsas heyətdə oynamayacaq. Mən məşqçi olaraq istəyərdim ki, getməsinlər, bizimlə birlikdə hazırlaşsınlar. Amma çağırsalar da futbolçular canla-başla gedəcəklər.

- Autsayderin lider üzərində qələbə qazanması sizə hansı nəticə çıxarmağa əsas verir?
-  Bu komandaları autsayder və lider kimi bölməzdim. Turnir cədvəlinə görə sıralama belədi. "Qəbələ"ni ilk "5-liy"ə, avrokuboklar zonasına layiq komanda sayıram. Məğlubiyyət mənimçün gözlənilməz olmadı.

- İsmayil İbrahimlinin zədəsi nə yerdədi?
- Bizim üçün ciddi itkidi. Çünki yerli oyunçumuz  azdı. "Sabah"la matçda yoxluğu diqqət çəkmədi, çünki qələbə qazanmışdıq. Yavaş-yavaş məşqlərə başlayır.