FİFA Hindistan Futbol Federasiyasının (HFF) bu təşkilata üzvlüyünü dayandıran qərarını dəyişib.

"Football-plus.az" xəbər verir ki, məlumatı ali futbol qurumunun mətbuat xidməti yayıb.

Avqustun 15-də verilən sanksiyaya üçüncü şəxslərin federasiyanın fəaliyyətinə müdaxiləsi səbəb olmuşdu, bu isə FİFA nizamnaməsinin ciddi şəkildə pozulması deməkdi. Xatırladaq ki, Hindistanın Ali Məhkəməsi mayda HFF-nin buraxılmasına qərar vermiş və ölkə futbolunun idarəçiliyi üçün üç nəfərdən ibarət komitə təsis etmişdi. Dövlət orqanının bu addımları səbəbsiz deyildi. Ali Məhkəmə 2020-ci ilə planlaşdırılan prezident seçkisini təşkil etmədiyi üçün federasiyanın rəhbəri Praful Pateli vəzifəsindən azad etmişdi.

Artıq Hindistanın Ali Məhkəməsininməlum qərarı ləğv edilib. Nəticədə HFF-nin əvvəlki rəhbərliyinin fəaliyyəti bərpa olunub. Bunu nəzərə alan FİFA isə sanksiyanı aradan qaldırıb. Qeyd edək ki, HFF-nin FİFA-dakı üzvlüyünün dayandırılması oktyabrın 11-dən 30-dək Hindistanda keçirilməli olan 17 yaşadək qızlar arasında dünya çempionatının bu ölkədə təşkilini sual altına almışdı. Son iki həftədə ali futbol qurumunun mundialın mümkün yeni məkanı ilə bağlı məsələni müzakirə etdiyi xəbər verilmişdi. Lakin sanksiya aradan qaldırıldığı üçün qızlar arasında DÇ-2022 ilə bağlı problem də həllini tapıb.