Misli premyer-liqasında 4-cü turun oyunları keçirilir.

“Football-plus.az” xəbər verir ki, “Neftçi” “Qəbələ”ni qəbul edib - 2:0. Matçdan sonra meydan sahiblərinin çalışdırıcısı Adrian Mutunun mətbuat konfransı keçirilib. Sizi mütəxəssisin fikirləri ilə tanış edirik:

- Sol cinah müdafiəçisi transfer etməyi planlaşdırırsız?
- Düşünmürəm ki, Kenni Sayefin bu gün oyununda problemlər oldu. Özünü yaxşı tərəfdən göstərə bilmədi. Həmin mövqedə Azər Əliyev də var. O mövqeyə oyunçu düşünmürük.

- Demişdiz ki, sağ cinah vingeri və hücumçu transfer edəcəksiz. Məsələlər nə yerdədi?
- Bəli, elədi. Danışıqlar yekunlaşmaq üzrədi. Bir neçə günə transferlər bitəcək.

- Premyer-liqada bir ayı geridə qoyursuz. Gələcəklə bağlı hədəfləriniz, ümidiniz nəyədi?
- Düşünürəm ki, qarşıda qoyulan məqsədlərə çata bilərik. Artıq avrokuboklardan kənarıq. Daha çox vaxtımız var ki, daxili oyunlara köklənək.

- Həm "Səbail"lə matçda, həm də bu gün oyunçularınız fair-play etmədi. Bu nədən irəli gəlir?
- Çox oyunçu bundan süi-istifadə edərək yerdə vaxt aparır. Hesab 0:0 olanda, vaxt aparırlar. Amma hesabda 0:1 geriyə düşən kimi vəziyyət dəyişir, əksini görürük.

- Ötən mövsüm Laurentsiu Regekampf da rumıniyalı futbolçu transfer etmirdi. Siz də, həmyerlilərinizə ehtiyac duymursuz. Bu nə ilə əlaqədardı?
- Gətirə bilməmişiksə, demək ki, xoşuma gələn olmayıb. Xoşuma gələnlərin də ya qiyməti yüksək olub, ya da müqavilələri var.

- Rza Cəfərov haqda fikriniz necədi?
- Gənc oyunçular haqda şərh vermək istəmirəm. Bundan qabaqkı matçda yaxşı oynadı. Bu gün etdiyi səhv onun üçün dərs olar, bundan nəticə çıxarar. Rza Azərbaycan üçün gələcəkdə yaxşı, perspektivli qapıçı ola bilər.

- "Neftçi"yə baş məşqçi təyin olunduqdan bu yana Rəhman Hacıyevə şans verirsiz, qollar vurur. Ondan gözləntiniz nədi?
- Çox yaxşı oyun nümayiş etdirir. Məşqlərdə də özünü yaxşı göstərir. Layiq olduğu üçün start heyətində oynadı. Öz performansı ilə buna layiq olduğunu göstərir. Ümid edirəm ki, bundan sonra daha da yaxşı oyun göstərəcək.