"Vacib olan komandanın qələbə üçün sona qədər mübarizə aparmasıdı"
Misli premyer-liqasında 3-cü tura yekun vurulub.
"Football-plus.az" xəbər verir ki, "Neftçi" "Sabah"ın qonağı olub - 1:1. Oyundan sonra "ağ-qaralar"ın çalışdırıcısı Adrian Mutunun mətbuat konfransı keçirilib. Sizi mütəxəssisin fikirləri ilə tanış edirik:
"Ağır və çətin oyun oldu. Xarakter göstərməyi bacardıq. Futbolçularımı təbrik edirəm. Meydanda sona kimi vuruşdular. Qələbə qazanmağa çalışdıq. Təəssüf ki, alınmadı. Vacib olan komandanın qələbə üçün sona qədər mübarizə aparmasıdı".
- Planınız ilk hissədə oyunu müdafiədən qurmaq idi?
- Təxminən belə idi.
- Rza Cəfərovun performansı sizi qane etdi?
- Bəli. Çətin oyun idi. Onu oynatmaq riskli görünürdü. Amma Rza bu gün göstərdi ki, gələcəkdə Azərbaycanın bir nömrəli qapıçılarından biri ola bilər.
- Qara Qarayevin gərgin olmasının səbəbi nə idi?
- Gərgin olduğunu deməzdim. Qara oyuna köklənmişdi. Yavaş-yavaş öz istədiyi formaya çatır. Bu gün "Neftçi"də ən yaxşı oyununu oynadı. Onun bizə çox köməyi dəyəcək.
